23 мая 2012 г.
«Урмарская» ăратлă кайăк-кĕшĕк фабрики» акционерсен уçă обществи республикăра кайăк-кĕшĕк ĕрчетессипе тупăшлă ĕçлекен хуçалăхсенчен пĕри.
Кунта тăрăшса вăй хуракан йышлă коллективăн ÿсĕмĕ курăмлă - 2011 çулта чăхсен йышĕ 94,9, хурсен 12,4, кăрккасен 6,5 пине çитнĕ. Кăçал та вĕсен йышне ÿстерсе пырас тĕллев лартнă кунти ĕçченсем.
Асăннă хуçалăхра пулнă май кайăк-кĕшĕк ĕрчетекенсен ĕçĕ-хĕлĕпе тĕплĕн паллашрăмăр. Кăçал чăх-чĕп пăхакансем чылай чĕпĕ çитĕнтернĕ. Хальхи вăхăтра кунта вĕсене сутас ĕç пырать. Е.Михайловăпа Т.Петрова туянма килекенсене çамрăк чăхсемпе вăхăтра тивĕçтерсе тăчĕç. Вырăнти халăх туяннисĕр пуçне кÿршĕллĕ Тутар Республикинчен те йышлăн килеççĕ. Пĕтĕмĕшле 140 пин çамрăк чăх сутнă. С.Иванова, Т.Шестова, Е.Николаева, Р.Никифорова, Л.Данилова, К.Николаева чăх-чĕп пăхакансем хăйсен ĕçне пысăк яваплăхпа пурнăçласа пыраççĕ. Галина Ивановна Алексеева тĕп зоотехник производство ĕçĕ-хĕлне тĕплĕн тĕрĕслесе тăрать. Халĕ кунти инкубаци цехне тата тепĕр 160 пин çăмарта хунă. Çитес вăхăтра асăннă общество татах та ытларах чăх чĕппи сутма тытăнĕ.