28 апреля 2012 г.
Апрелĕн 29-мĕшĕнче Чăваш патшалăх символĕсен кунĕ.
Çавна май çак темăпа районти тĕп библиотекăри краеведени уйрăмĕнчи Р.Иванова библиотекарь кĕнекепе иллюстраци куравне хатĕрленĕ. Наци Гербĕ, Ялавĕ тата Гимнĕ – Чăваш Патшалăхĕн символĕсем. Патшалăх символĕсем халăх историне – унăн иртнипе пуласлăхне, йăли-йĕркине кăтартаççĕ, пĕр территорире пурăнакансене пĕрлештерсе тăраççĕ. Вăрмарти Г.Е.Егоров ячĕллĕ пĕрремĕш вăтам шкулта вĕренекенсем библиотекăри «Наци мăнаçлăхĕ – Чăваш Ен символĕсем» ятпа Р.Иванова библиотекарь ертсе пынă информаци сехетне хутшăнчĕç. Ачасем «Нацин чи хаклă япалисем:флаг, герб тата гимн», «Элли Михайлович Юрьев – Чăваш Республикин патшалăх гербĕн тата патшалăх флагĕн авторĕ» темăпа С.Щербакова библиотекарь (ÿкерчĕк çинче) каласа панине тимлесех итлерĕç. Мероприятире «Чăваш Республикин патшалăх символĕсем: истори тата паянхи кун» ятпа электронлă презентаци иртрĕ. Юлашкинчен библиотекарьсем вĕренекенсем патшалăх символĕсем çинчен мĕн пĕлнине тĕрĕслесе, çирĕплетсе çак темăпа викторина ирттерчĕç.