17 марта 2012 г.
«Çĕр çинче пур професси те лайăх, анчах та кăмăла кайни пĕрре кăна», - тет «Йăла ыйтăвĕсене тивĕçтерекен Вăрмарти комбинат» муниципаллă унитарлă предприятире парикмахер пулса вăй хуракан Е.Вотякова. Пултаруллă та ăста парикмахер клиентсен ыйтăвĕсене туллин те пахалăхлă тивĕçтерме тăрăшать. Унпа пĕрлех С.Антонова, М.Панасюк парикмахерсем хăйсен ĕçне çÿллĕ шайра пурнăçласа пыраççĕ. Туслă коллективра ĕç ăнать. Кунне 30-40 клиент йышăнаççĕ вĕсем, арçынсен залĕнче тăрăшнă май кашнинех хăйне евĕрлĕ илемлĕ прическа тума тăрăшаççĕ. Çавăнпа клиентсем те вĕсен ĕçĕпе кăмăллă, кунта пĕрре пулса курнă çын тепĕр хут килни те вĕсен ĕçне пысăк хак панипе танах. Пĕтĕмĕшле каласан, парикмахерсем хăйсен маркине çÿллĕ шайра тытаççĕ, професси уявне савăк кăмăлпа кĕтсе илме хатĕрленеççĕ.