14 марта 2012 г.
Потребительсен прависене хÿтĕлемелли Пĕтĕм тĕнчери куна мартăн 15-мĕшĕнче паллă тăваççĕ. Потребительсен прависене хÿтĕлессине райадминистрацин экономика аталанăвĕн пайĕ пурнăçласа пырать. Иртнĕ çул кунта тĕрлĕ ыйтупа 9 çын пынă. Ыйтусенчен ытларахăшĕ пахалăхлă тавар сутманни тата юсав ĕçĕсене çителĕклĕ шайра пурнăçламанни пирки пулнă. Çавăн пекех карас телефонĕсем сутакан лавккасем пахалăх тĕлĕшĕнчен тивĕçтереймен карас телефонĕсем сутнипе çыхăннă ыйтусем те чылай пулнă. Райадминистрацин специалисчĕсем ял тăрăхĕсене тухса вĕсенчи лавккасенче, суту-илÿ вырăнĕсенче тĕрĕслев ирттернĕ, социаллă пĕлтерĕшлĕ таварсен хакне ÿстермелле маррине палăртнă.
Пĕтĕм тĕнчери куна халалласа Роспотребнадзор управленийĕ мартăн 15-мĕшĕнче 15-17 сехетсем хушшинче «хĕрÿ лини» ирттерет. Тел.: 8-835-45-21-2-37. Райадминистрацинче çынсене консультаци мартăн 16-мĕшĕнче 9 сехетрен 16 сехетчен (210 пÿлĕм) параççĕ.