14 марта 2012 г.
Чăваш Ен Пуçлăхĕ М.Игнатьев Министрсен Кабинечĕн членĕсемпе тата федераци ведомствисен территори органĕсен ертÿçисемпе ирттернĕ канашлура чылай ыйтусем сÿтсе явнă. Вĕсенчен пĕлтерĕшлисенчен пĕри - çурхи ейĕве ирттерсе ярасси.
ГКЧС ертÿçи Ю.Кекиш çурхи ейĕве хатĕрленнипе çыхăннă ĕçсем çинчен каласа панă. Республикăра юр хулăнăшĕ вăтамран 50-56 сантиметрпа танлашать - иртнĕ çулсенчи вăтам кăтартуран 10-15 сантиметр нумайрах. Ейÿ вăхăтĕнче 58 ялти çурт-йĕр шыв илекен зонăна лекес, çавăн пекех 85 тăваткал километрпа танлашакан ял хуçалăх çĕрĕсем шыв айне пулас хăрушлăх пур.
Республикăри юхан шывсенче апрелĕн малтанхи кунĕсенче пăр кайма пуçламалла. Чăваш Ен Пуçлăхĕ М.Игнатьев гидротехника сооруженийĕсем тĕлĕшпе уйрăмах тимлĕ пулма сĕннĕ, хуçасăр объектсене арендăна парассине хăвăртлатмаллине каланă.