15 февраля 2012 г.
Февралĕн малтанхи кунĕсенче Шупашкарти И.Я.Яковлев ячĕллĕ педагогика университетĕнче 9-11 класра вĕренекенсем хушшинче регион шайĕнче технологи предмечĕпе Раççей олимпиади иртрĕ.
Пилĕк номинацире хăйсен пултарулăхĕпе паллаштарчĕç унта хутшăнакансем. Пĕрремĕш кунхине ачасем теори, ĕçлев енĕпе хăйсен ăсталăхне кăтартрĕç. Жюри членĕсем ачасем килте ăсталанă тĕрлĕ ал ăсталăх изделийĕсене, проекчĕсене хак пачĕç. Тепĕр кунне вара ачасем кашниех жюри членĕсем умĕнче хăйсен творчество проекчĕсене хÿтĕлерĕç. Çивĕч тупăшура тăххăрмĕш класра вĕренекен арçын ачасем хушшинче Шăхальти тĕп шкулта вĕренекен Дмитрий Хованский пĕрремĕш вырăн çĕнсе илчĕ, 11 класра вĕренекен хĕрачасем хушшинче Вăрмарти Г.Е.Егоров ячĕллĕ вăтам шкулта вĕренекен Надежда Егорова иккĕмĕш вырăна тухрĕ. Н.Егорована, Д.Хованские тата вĕсен наставникĕсене, Шăхальти тĕп шкулта вĕрентекен технологи учительне А.Горбунова тата Вăрмарти вăтам шкулта вĕрентекен технологи учительне О.Васильевана, хĕрÿллĕн саламлатпăр. Вĕсене малалла та пысăк çитĕнÿсем тума ырлăх-сывлăх, ăнăçусем сунатпăр.