02 января 2012 г.
Çĕнĕ Çул хыççăн православи тĕнне ĕненекенсем чи пысăк уявсенчен пĕрне - Раштава паллă тума хатĕрленеççĕ. Ăна Вифлеемра çуралнă Иисус Христоса асăнса уявлаççĕ. Раштав хăйĕн пĕлтерĕшĕпе христианство тĕнне тытса пыракансемшĕн Мăнкун хыççăн иккĕмĕш уяв шутланать.
Христос çуралнă умĕнхи каç - Сочельник. Раштав Сочельникĕнче тутлă апат-çимĕç хатĕрленĕ. Кил-çурта тасатнă, сĕтел çине таса çивитти сарнă, калаçмасăр апатланнă. Çав хушăрах хресченсем ачасене сĕтел айне кĕрсе чăх-чĕппи евĕр «пиклетме» хушнă. Çак йăлана чăхсем ăнччăр тесе пурнăçланă.
Раштав умĕн хапха умĕнче кăвайт чĕртнĕ, ку тĕнчерен уйрăлнă ашшĕ-амăшĕсем ăшăнма килессе, çак çулăма пула тулă ăнса пуласса пĕлтернĕ.
Ĕненекен çын елкăна Раштав кунĕ тĕлне кăна илемлетет, унăн тăррине çăлтăр - Раштав çăлтăрне - вырнаçтарать. Парнесем парасса та çак куна хăварать, мĕншĕн тесен волхвăсем Христос çуралсанах ун патне парнесемпе пынă-çке. Раштав хыççăн 12 кун хушши, Кăшарни таран, Çветки тăсăлнă. Çак вăхăтра кашнинех çынсене ырă тума тăрăшмалла. Больницăсемпе ача çурчĕсене çитсе килсен аван пулмалла. Çветкине ăсатнă чухне вăхăта телевизор умĕнчи ирттерни - ăна сая яни пулать.