08 ноября 2011 г.
Шкулта вĕренекенсем спортпа туслă пулнине кашниех пĕлет пулĕ. Пур ăмăртăва каймассерен вĕсем малти вырăнсем йышăнса килеççĕ. Физкультура учителĕ Ю.Николаев ачасене спортпа туслă пулма вĕрентет. Пулас спортсменсем каланă тăрăх: «Кашни ăмăртура пирĕн «ÿссе» пырас килет, тĕслĕхрен, малтанхи ăмăртура иккĕмĕш вырăн йышăннă пулсан, хальхинче пĕрремĕш вырăна тухас килет», - теççĕ вĕсем. Кун пек пулсан хисепе тивĕçлĕ пулас спортсменсем чылай çитĕнмелле.
Малти вырăнсем йышăнма ачасем валли пĕтĕм услови пур: коридорсенче - теннисла вылямалли сĕтелсем, унта кашни тăхтав вăхăтĕнче е уроксем хыççăн ачасем пуçтарăнса теннисла выляççĕ. Çавăн пекех баскетболла та, волейболла та выляма пултараççĕ. Юрий Меркурьевич вĕсене яланах хаваспа кĕтет.
Пĕлтĕр вара эпир пĕрре кăна мар Вăрмарти «Илем» бассейна кайса сывлăха çирĕплетнĕ. Кăçал та унта кайма тĕллев лартнă.