04 октября 2011 г.
Усрава илнĕ çемьесенчи тăванлăх çыхăнăвне çирĕплетес, ашшĕ-амăшĕн хÿтлĕхĕсĕр юлнă ачасене çемьесене вырнаçтарас проблема çине тимлĕх уйăрас тĕллевпе Çĕнĕ Шупашкарти «А.Андрианов ячĕллĕ çамрăксемпе ачасен пултарулăхĕн аталану центрĕ» хушма пĕлÿ паракан муниципаллă вĕрентÿ учрежденинче усрава илнĕ çемьесен республика слечĕ иртнĕ. Слета ЧР вĕрентÿпе çамрăксен политикин министрĕн çумĕ С.Петрова уçнă. Çемьесем умĕнче ЧР ача прависене хÿтĕлес енĕпе ĕçлекен уполномоченнăйĕ А.Андреев, Çĕнĕ Шупашкар хула администрацийĕн пуçлăхĕн заместителĕ В.Матвеев тухса калаçнă. Çавăн пекех слета усрава илнĕ çемьесемпе ĕçлекен центр ертÿçи Е.Гаврилова, А.Андрианов ячĕллĕ çамрăксемпе ачасен пултарулăхĕн аталану центрĕн директорĕн çумĕ Н.Захарова, районти опекăпа попечительство енĕпе ĕçлекен специалисчĕсем хутшăннă. Пирĕн районтан республика слетĕнче Л.Симушкина усрава илнĕ Снежана хĕрĕпе, Л.Григорьева Татьяна, Александр тата Анастасия ачисемпе пулнă. Вĕсем тĕрлĕ конкурссене: Татьянăпа Александр спорт ăмăртăвĕсенче тупăшнă, Анастасия ÿкерес енĕпе палăрнă, Снежана психологи тренингне хутшăннă. Слет вăхăтĕнче курав залĕнче тата «Астăвăм» музейра пулса курнă. Куравра хăйсен творчествăлла ĕçĕсемпе паллаштарнă.