02 сентября 2011 г.
Çул-йĕр правилисене çирĕп пурнăçласа пырасси кашни водителĕн, механизаторăн е çуран çÿрекенĕн таса тивĕçĕ. Анчах та пур чухне те асра тытатпăр-и-ха эпир çакна; Çук çав. Çавна пулах çул çинче аварисем пулаççĕ, çынсен пурнăçĕ татăлать.
Çĕнĕ вĕренÿ çулĕ пуçланчĕ. Кăçалхи августăн 15-мĕшĕнчен пуçласа сентябрĕн 11-мĕшĕччен районта: «Асăрханăр: ачасем!» операци ирттереççĕ. Унăн тĕллевĕ - шкулта вĕренекенсене тимлĕхе ÿстерме хăнăхтарасси, çул çинчи хăрушсăрлăха пăхăнма вĕрентесси.
Учительсен, шкул çулне çитмен учрежденисенчи воспитательсен вĕренÿ çулĕ пуçланнă кунсенченех ачасене транспорт хатĕрĕсем çÿрекен автомобиль çулĕсем урлă каçнă е утса пынă чухне асăрхануллă пулмалли çинчен, çул-йĕр хăрушсăрлăхĕн правилисене çирĕп ăнлантарса памалла. Çынсем çул хĕррипе утнă чухне транспорта хирĕç пымалла. Ачасен ушкăнне тротуарсемпе тата çуран çÿрекен сукмаксемпе илсе çÿремелле.