16 августа 2011 г.
Сĕм вăрман сарăлса ларать. Мĕн тĕрлĕ йывăç çук-ши кунта? Яштака хурăнсем, çирĕп юмансем, лапсăркка вĕренесемпе çăкасем çил вĕрнипе пĕр чарăнми кашлаççĕ. Пур-ши, çук-ши ку вăрманăн вĕçĕ? Янкăр та таса тÿпере сарă хĕвел курăнать, вăл хăйĕн пайăркисене тавралăха сапалать.
Вăрман çулĕ çинче тăватă чăваш: Ахвантер, Аплиас, Алсарей, Ветсер. Вĕсем хăйсем ăçта утнине чухламаççĕ. Вăрман илемĕпе киленеççĕ.
Хĕл иртет. Юр ирĕлнĕçемĕн ирĕлсе пырать, вăл куççуль юхтарса çырманалла çул тытать. Акă курăк та сăмсаланать. Тăватă чăваш хырăм выçнине туяççĕ, апат ăçтан тупмалли çинчен шухăшлаççĕ. Серте тухнă пулсан серте яшки пĕçерсе çиме пулатчĕ те...
Çапла утсан-утсан чăвашсем вăрăм та тарăн çырма хĕррине килсе тухаççĕ, канма лараççĕ.
Çырмана йĕри-тавра пăхса сăнасан тĕлĕнсех каяççĕ. Çырма пилĕк çырмапа пĕрлешет иккен. Ку вырăна паллă туса хăварса малалла утаççĕ. Миçе çăл куç курмаççĕ-ши вĕсем çул çинче? Çапах кашнинче тăп-тăрă шыв.
Çапла вĕсем хăйсем шыраса тупнă вырăна çуртсем лартма пикенеççĕ, çемйисемпех куçса килеççĕ.
Çапла вара вун улттăмĕш ĕмĕрте Мăнçырма хĕррине чăваш ялĕ вырнаçать, ячĕ вара - Мăнçырма. Унтан çак ял сарăлнăçемĕн сарăлса пычĕ, икĕ каслă пуличченех...