01 июля 2011 г.
Июнь уйăхĕн вĕçĕнче Йĕпреç районĕнчи Пучинке ялĕнче Республика кунĕ вăхăтĕнче ял тăрăхĕсен командисем хушшинче республикăри 5-мĕш Спартакиада тата лашасемпе юртассипе «Камай уйĕн лашисем» турнир иртнĕ.
Камай уйне килнисене саламлакан йышлă пулнă. ЧР Министрсен Кабинечĕн Председателĕн çумĕ - республикăн ял хуçалăх министрĕ С.Павлов, ЧР физкультурăпа спорт тата туризм министрĕ А.Николаев спортсменсене, хăнасене, куракансене уяв ячĕпе саламласа ырлăх-сывлăх суннă.
Ун хыççăн ялсенчи, районсенчи ăмăртусенче палăрнă атлетсем тĕрлĕ спорт вăййисене хутшăннă. Çак курăмлă тупăшура Арапуç ял тăрăхĕн команди лайăх результат кăтартнă, 2-мĕш вырăн çĕнсе илнĕ. Команда çитĕнĕвĕ унăн уйрăм членĕсенчен килет. Çавăнпа та çакна палăртма кăмăллă: акă уйрăм тупăшура ял тăрăхĕн пуçлăхĕ А.Агеев кире пуканĕ çĕклессипе 2-мĕш вырăн, С.Иванова, Е.Спиридонов 3-мĕш вырăнсем йышăннă, Д.Федоров 5-мĕш пулнă. Çак спорт енĕпе пирĕн ентешсем команди 2-мĕш вырăн йышăннă. И.Петров çур тонна таякан лаша урапине 10 метра туртассипе 2-мĕш вырăн, 80 килограмлă хăйăр миххине 2 минут хушшинче 30 хут çĕклесе 3-мĕш пулнă. Шыв тултарнă витресемпе чупассипе С.Ивакова 2-мĕш вырăна тухнă. Хăнасем хушшинче лаша кÿлсе тăварас енĕпе ирттернĕ конкурсра «Урмарская» ăратлă кайăк-кĕшĕк фабрикинче ĕçлекен А.Федоров малта пулнă.
Лапталла выляса, канат туртса, кире пуканне хапха урлă ывăтса, пĕрене çинче михĕпе çапăçса М.Михайловпа А.Максимов, шывра ишессипе Е.Петров, лашапа суха тăвас конкурсра А.Ефремовпа С.Иванова çаврăнăçуллăрах пулнă, лайăх результатсем кăтартнă.
Пĕтĕмĕшле кăтартусем тăрăх пĕрремĕш вырăна Патăрьел районĕнчи Нăрваш Шăхальсем тухнă пулин те, çакна каласах хăвармалла - çак яла никĕслекенĕсем пирĕн ентешсем - Шăхальсем пулнă-çке. Эппин, малти вырăнсем пирĕн те, Вăрмарсенче.