01 июля 2011 г.
Вăрмар райповĕн хуçалăхĕ пĕрре те пĕчĕк мар: 52 лавкка, обществăлла апатлану предприятийĕ, «Вăрмарти çăкăр завочĕ», «Нива» тулли мар яваплă обществăсем, çĕвĕ цехĕ, хатĕрлев енĕпе ĕçлекен отрасль, медицина, ветеринари аптекисем. Вĕсенче пĕтĕмпе 260 çын тăрăшса вăй хурать. Юлашки çулсенче суту-илÿ рынокĕнче конкуренци пуç пулса тăрать пулин те, райпо хăйĕн умне çĕнĕ тĕллевсем лартса вĕсене ăнăçлă пурнăçлама тăрăшать.
Малта пыракан опыта тĕрĕс усă курса малашлăх çинчен шухăшлани ĕç кăтартăвĕсене ÿстерме май парать. Çакна райпо ĕçченĕсем лайăх ăнланаççĕ, пурнăçа кĕртме тăрăшаççĕ.
«Ял халăхĕн пурнăç условийĕсене лайăхлатасси райпо ĕçченĕсемшĕн приоритетлă задачăсенчен пĕри пулса тăрать. Ку енĕпе эпир тĕллевлĕ ĕçлетпĕр.
Иртнĕ çул çанталăк шăрăх тăнине пула ял ĕçченне уйрăмах йывăр килчĕ. Чылайăшĕн хĕл каçма выльăх апачĕ çителĕксĕр пулчĕ, çавăн пекех тĕш тырăпа пăрçа йышши культурăсем, çĕрулми те хăйсен тухăçĕпе савăнтармарĕç. Çавна май вырăнти халăха кирлĕ продукципе вăхăтра тивĕçтерессине райпо хăй çине илчĕ. Ял халăхĕ заявка панă тăрăх хĕлĕпех тĕш тырăпа, авăртнă тырă хутăшĕпе, çĕр улмипе вăхăтра тивĕçтернĕ. Утă кÿршĕ республикăсенчен турттарнă, çĕр улмипе вара республикăри хуçалăхсенчен тивĕçтернĕ. Кăçал халăха тĕш тырă - 64, апат-çимĕçлĕх çĕр улми - 30, вăрлăхлăх çĕр улми - 22, утă 10 тонна сутнă. Ку енĕпе «Пучах» лавкка, райпон хатĕрлев кантурĕ лайăх ĕçленине палăртмалла. Хресчен (фермер) хуçалăхĕсемпе ятарласа килĕшÿ тунă: райпо вĕсене утăпа тивĕçтерсе тăнă, фермерсем вара сĕт панă.
Сăмах май çакна палăртмалла: юлашки вăхăтра райпо хатĕрлев ĕçĕсемпе ăнăçлă тăрăшать. Çăмăл мар ку ĕç, анчах та социаллă пысăк пĕлтерĕшлĕ. Çавăнпа та пирĕн общество халăхран пахча çимĕç, аш-какай, сĕт, эмел курăкĕ туянассин калăпăшне ÿстерме тăрăшать. Ку вара ялта пурăнакансемшĕн питĕ меллĕ: аякка каймасăрах вырăнти лавккасенче ял хуçалăх продукцине вырнаçтарма пултараççĕ», - терĕ райпо Канашĕн председателĕ Сергей Николаевич Харитонов хăйсен ĕçĕ-хĕлĕпе паллаштарнă май.
Илемлĕ япала яланах куçа илĕртет. Çĕнĕ сăн кĕртнĕ лавккасене курсан вара вĕсене кĕрсе япала туянмасăр каяс та килмест. Сутуçисем ăш-пиллĕ те таравтлă, тавар ассортименчĕ пуян пулсан мĕн кирлине пĕтĕмпех туянас кăмăл çуралать. Вăрмар райповĕн яваплă çыннисен шучĕпе кашни лавкка, столовăй, кафе культура центрĕ пулмалла. Вĕсенче яланах ыр кăмăллăх, ăш пиллĕх хуçалантăр. Çавна май йывăрлăхсене пăхмасăрах лавккасене çĕнетесситпе, çĕнĕ оборудовани туянассипе укçа-тенкĕ шеллемеççĕ. Нумаях пулмасть Тикаш, Энĕшпуç, Кивĕ Вăрмар ял лавккисенче капиталлă юсав ĕçĕсем пурнăçланă, вĕсенче халĕ тавара ирĕклĕ майпа туянма пулать. Унсăр пуçне Арапуçĕнчи, Кивĕ Шулханти, Пысăк Енккассинчи, Шăхальти суту-илÿ вырăнĕсене, «Юность», «Минутка» кафесене çĕнетнĕ. Тупах ялĕнче вара суту-илÿ павильонĕ лартнă. Поселокри универмага та шал енчен хăтлăх кĕртнĕ.
Райпон «Заря» лавккинче пулнă май, унти тавар туянакансемпе курса калаçма тÿр килчĕ. «Эпир ку лавккана хаваспах çÿретпĕр. Вăл хăйĕн хăтлăхĕпе, сутуçăсен тараватлăхĕпе илĕртет. Унпа пĕрлех тавар ассортименчĕпе те пуян. Вырăнта туса кăларнă продукцине туянма уйрăмах кăмăллă - хăйĕн пахалăхĕпе, экологи тĕлĕшĕнчен таса апат-çимĕç туса кăларнипе уйрăлса тăрать», - теççĕ вĕсем.
«2011-2014 çулсенчи потребкоопераци аталанăвĕ» программăпа килĕшÿллĕн пурлăхпа-техника базине çирĕплетес тĕлĕшпе укçа-тенкĕ чылай хывнă. Кăçал та тĕллевсем пысăк вĕсен: Пинер, Чупай, Эçпепе лавккисене тĕпрен çĕнетмелле.
«Райпо вăйĕ - кадрсенче. Вĕсем тăрăшнипе паян пирĕн предприяти ăнăçлă ĕçлесе пырать. Коллективра пултаруллă та ĕçчен çынсем тăрăшса вăй хураççĕ. Уйрăмах хатĕрлев енĕпе тăрăшакан Е.Гурьева специалиста палăртмалла. Вăл чылайранпа райпо системинче пысăк тăрăшулăх кăтартать. Сутуçăсен хушшинче лайăх ĕçлесе пыракансем сахал мар. Чулкасри, Мăнçырмари «Новинка», Шутнерпуçĕнчи, Вăрмар поселокĕнчи «Заря» лавкка, поселокри аптека заведующийĕсем П.Илларионова, Е.Павлова, И.Федотова, В.Степанова, А.Федорова ĕçе чунтан парăнса пурнăçлаççĕ», - пĕлтерет С.Харитонов.
Палăртма кăмăллă: Вăрмар кооператорĕсем ял çыннисемпе тачă çыхăнура ĕçлеççĕ, çакă вĕсене çивĕч ыйтусене кĕске вăхăтра татса пама пулăшаççĕ. Пĕрлĕхре - вăй. Çак тĕллеве тĕпе хурса тăрăшаççĕ те райпо ĕçченĕсем. Эппин эпир вĕсене пархатарлă ĕçре ÿсĕмсем сунатпăр.