28 июня 2011 г.
«Урмарская» ăратлă кайăк-кĕшĕк фабрики акционерсен уçă обществинче 1983 çултанпа тăрăшать Геннадий Михайлович Петров. Пурнăçĕпе йăлт ял хуçалăх ĕçне парăннă тейĕн ăна. Чăх-чĕп ĕрчетекен фермăра пулса курман çын кунта кулленех мĕнле ĕçсем пынине ăнланса та пĕтереймест ĕнтĕ. Механизаци системине пăхса, юсасах тăмалла. Геннадий Михайлович хуçалăхра инженер ĕçне пурнăçланă вăхăтрах кунти рабочисен ĕç прависене хÿтĕлессипе те активлăх кăтартать. 1995 çултанпа «Урмарская» ăратлă кайăк-кĕшĕк фабрикин пуçламăш профсоюз организацийĕн председателĕ вăл. Хăйĕн ĕçне тĕплĕн пурнăçланине, шанчăклă çын пулнине кура коллектив ăна çак тивĕçе пурнăçлама темиçе хутчен те суйланă. 2010 çулта Г.Петров пуçламăш профсоюз организцийĕсем хушшинче иртнĕ конкурсра лауреат ятне тивĕçнĕ, РФ Агропромышленноç комплексĕн ĕçченĕсен профсоюз организацийĕн дипломне илнĕ. Çавăн пекех ăна хăйĕн ĕçне тÿрĕ кăмăлпа пурнăçланăшăн Тав çырăвĕ те панă. Пирĕн республикăри пĕртен-пĕр хуçалăх тивĕçнĕ çак наградăна.
Геннадий Михайлович 1958 çулта Кивĕ Вăрмар ялĕнче çуралнă. Мĕн ачаран ĕçпе пиçĕхсе ÿснĕскер çар службинчен таврăнсассăн та хăйне ял хуçалăхĕпе çыхăнтарас тĕллевпе Çĕрпÿри ял хуçалăх техникумне куçăмăср майпа вĕренме кĕрет. Çавăн пекех вăл район депутачĕсен Пухăвĕн 5-мĕш созыври депутачĕ те. ЧР, РФ Хисеп грамотисем те унăн ĕçĕ сумлă пулнине палăртаççĕ. Ялта ятлă-сумлă çын, мăшăрĕпе, Людмилăпа, хĕрпе ывăл çитĕнтернĕ.