28 июня 2011 г.
Хуть те мĕнле çитĕнÿ тупăшура палăрать. Вăйпа кĕрешетĕн-и, ăс-хакăл енĕпе ăмăртатăн-и, ăсталăхна кăтартатăн-и - пуринче те çĕнтерÿ пулатех. Çитĕнÿ тума, малти пулма çыннăн талантлă, хастарлă пулмалла. Унсăр «ылтăнлисемпе» «кĕмĕллисем» шутне кĕме çук.
Ачасен пултарулăхне аталантарас, тавра курăмне çивĕчлетес, вĕсене общество пурнăçне активлăн хутшăнтарас, Тăван çĕршыва юратма хăнăхтарас енĕпе районта чылай конкурс, фестиваль, ăмăрту иртет. Кăçал та йăлана кĕнĕ тăрăх Чăваш милицийĕпе пушар хуралне йĕркеленине халалласа районти шкул ачисем хушшинче «Саккунпа йĕркелĕх хуралĕнче» пултарулăх конкурсĕ пулчĕ. Унăн тĕллевĕ - ÿссе çитĕнекен ăрăвăн патриотизм туйăмĕсене аталантарасси, йĕрке хуралĕн профессийĕсене пропагандăласси, пушартан сыхланасси, çул çитменнисем йĕркене пăсассинчен профилактика ĕçĕ ирттересси. Конкурса шкулта вĕренекенсен хайлавĕсемпе коллективлă ĕçсем чылай килнĕ. Ĕçсене хаклама хисеплĕ комисси йĕркеленĕ: райадминистрацийĕн пуçлăхĕн çумĕ Ю.Соколов, РФ тата ЧР культурăн тава тивĕçлĕ ĕçченĕ Д.Егоров, Республикăри ĕç сыхлав центрĕн директорĕ В.Нягин, ШĔМ ветеранĕсен совечĕн председателĕн çумĕ Л.Егоров, МЧС ăн Тĕп управленийĕн пресс-служба пуçлăхĕ О.Нягина тата район хаçачĕн тĕп редакторĕ П.Алексеев. Нумаях пулмасть жюри членĕсем пĕтĕмлетÿ турĕç.
«Статьясем, очерксем, калавсем, сочиненисем, тĕпчев ĕçĕсем» номинацири уйрăм ĕçсем хушшинче малти вырăнсене çаксем тухрĕç: Вăрмарти 1-мĕш номерлĕ вăтам шкулта 8 «г» класра вĕренекен А.Константинов, Кĕлкеш шкулĕнче 6-мĕш класра ăс пухакан К.Краснова, Пысăк Енккасси шкулĕнче вĕренекенсем - М.Тимофеева (7 класс), О.Степанова (10 класс), Г.Русскова (9 класс), Энĕшпуç шкулĕнчи 1 класс ачи С.Расколов. Коллективлă ĕçсем хушшинче 1 вырăна Кĕтеснер шкулĕнчи М.Краснова ертсе пыракан краеведени музейĕн членĕсем (Н.Захарова, К.Захарова, Е.Краснова) тата Кивĕ Вăрмар шкулĕнче 6-мĕш класра вĕренекенсем - Е.Волостнова, Е.Силерова, Н.Яковлева (ертсе пыраканĕ Р.Васильева) йышăнчĕç. Иккĕмĕш вырăнта - Кивĕ Вăрмар шкулĕнчи 2-мĕш класс ачисем (класс ертÿçи И.Николаева).
Макетсемпе ал ĕç япалисем ăсталаса уйрăм ĕçсем хушшинче малти вырăна Энĕшпуç шкулĕнче вĕренекенсем - П.Иванов (2 класс), С.Расколов (1 класс), А.Яковлев (3 класс) тухрĕç. Иккĕмĕш вырăна А.Дмитриев, А.Васильев (Энĕшпуç шкулĕ, 3 класс), А.Кириллов (Кивĕ Вăрмар шкулĕ, 6 класс) тивĕçрĕç. Тикаш шкулĕнче 4-мĕш класра вĕренекен А.Семенов, Энĕшпуç шкулĕнчи 3 класс ачисем А.Яковлевпа А.Павлова - виççĕмĕш вырăнта. Коллективлă ĕçсем хушшинче чи пултаруллисем çаксем пулчĕç: Кивĕ Вăрмар шкулĕнче С.Антонов ертсе пыракан моделировани кружокне çÿрекенсем, Ачасен пултарулăх çурчĕн «Çемçе тетте» кружок воспитанникĕсем (ертÿçи Н.Львова), Çĕнĕ Кинчерти шкулта 3-мĕш класра вĕренекенсен ушкăнĕ (класс ертÿçи М.Крылова).
«Ÿкерчĕк» номинацинче С.Михайлова (Кивĕ Вăрмар шкулĕ, 9 класс), А.Николаев (Аслă Чак шкулĕ, 9 класс), Н.Крылов, Н.Кириллова тата Е.Романова (Çĕнĕ Кинчер шкулĕнче 3-мĕш класра вĕренекенсем, класс ертÿçи М.Крылова) çĕнтерÿçĕсем пулса тăчĕç.
Çавăн пекех жюри çак пултаруллă ачасен ĕçĕсене палăртрĕ: Çĕнĕ Кинчер шкулĕнчи 3-мĕш класс ачисене А.Крылована, Д.Сергеева, Н.Иванована, Кĕтеснер шкулĕнче 6-мĕш класра вĕренекен Е.Никифорована, Мăнçырма шкулĕн ачисене К.Васильевпа (8 класс) М.Григорьева (1 класс), кунти ача садне çÿрекен Е.Цыркунована, Кивĕ Вăрмар шкулĕнчи 5-мĕш класа çÿрекен У.Джафарована, 2 класс ачисене К.Николаевпа М.Петрова, Чулкас шкулĕн ачине С.Петрована (9 класс), Энĕшпуç шкулĕнче 1-мĕш класра вĕренекен А.Игнатьевана, Кĕлкеш шкулĕнче вĕренекенсене Е.Натаровапа (1 класс) А.Кузьминана (9 класс), Вăрмарти 1-мĕш номерлĕ вăтам шкулти ачасене М.Матвеевана (7 класс), Я.Казакована (6 класс), Н.Николаевпа Д.Гуломова (2 класс), А.Михайлована (5 «г» класс) та парнесем парса чыслама йышăнчĕç.
Конкурса хутшăнас ĕçе лайăх йĕркеленĕ шкулсем хушшинче те малтисене палăртрĕç: 1-мĕш вырăн - Çĕнĕ Кинчер шкулĕ, 2-мĕш - Энĕшпуç шкулĕ, 3-мĕш вырăнта - Вăрмарти пĕрремĕш номерлĕ шкул.
Чи пултаруллă педагогсене райадминистрацин вĕрентÿпе çамрăксен политикин пайĕн грамотипе наградăлама тĕв турĕç, вĕсен шутне çаксем кĕчĕç: М.Крылова - Çĕнĕ Кинчер шкулĕнчи пуçламăш классен учителĕ, В.Иванов - Пысăк Енккасси шкулĕнчи ОБЖ учителĕ, В.Иванова - Энĕшпуç шкулĕнче пуçламăш классене вĕрентекен.
Çĕнтерÿçĕсене июлĕн 5-мĕшĕнче районти шалти ĕçсен пайĕн çурчĕ патĕнче хăйсен тивĕçĕсене пурнăçланă чухне пуçĕсене хунă милици сотрудникĕсене асăнса лартнă обелиск умĕнче чыслĕç.