28 июня 2011 г.
Иртнĕ эрнере пирĕн районта ЧР Патшалăх Канашĕн Председателĕ М.Михайловский тата хула строительствипе обществăлла инфратытăм аталанăвĕн министрĕ А.Гончаров пулчĕç.
Михаил Алексеевичпа Александр Николаевич Вăрмарти Çĕнтерÿçĕ салтакăн палăкĕ умне чечексем хучĕç. Республика кунне халалласа ирттернĕ мероприятисем пирĕн районта та пулчĕç. Савăнăçлă лару-тăрура Аслă Отечественнăй вăрçă ветеранĕсене, вăрçă участникĕсен тăлăх арăмĕсене тата кивĕ, авариллĕ çуртсенчен куçакансене çĕнĕ хваттерсен уççисене пачĕç. Телейлĕскерсем çĕнĕ хваттер уççисене ЧР Патшалăх Канашĕн Председателĕн М.Михайловскийрен, ЧР хула строительствипе обществăлла инфратытăм аталанăвĕн министрĕнчен А.Гончаровран, район пуçлăхĕнчен В.Павловран, район администрацийĕн пуçлăхĕнчен К.Никитинран илчĕç. Вăрçă ветеранĕсем, вăрçă участникĕсен тăлăх арăмĕсем, кивĕ тата авариллĕ çуртсенче пурăнакансем çакăн пек хаклă парнеллĕ пулнишĕн ЧР Правительстви, Вăрмар район администрацийĕ нумай тăрăшнине палăртрĕ ЧР Патшалăх Канашĕн Председателĕ М.Михайловский. Вăл ЧР Патшалăх Канашĕн, «Единая Россия» партин регионти уйрăмĕн ячĕсенчен çĕнĕ хваттерсенче телейлĕ пурнăçпа нумай çул хушши пурăнма, сывлăхлă пулма сунчĕ. Вăрмар район пуçлăхĕ В.Павлов кунта пуçтарăннисене пурне те сывлăх, ăнăçу, телей, мĕн пур лайăххине сунчĕ.
Район администрацийĕн пуçлăхĕ К.Никитин çĕнĕ çурта хăпартса пĕтернĕшĕн «Урмарская» коллективлă строительство организацийĕ» акционерсен хупă обществин строителĕсене, вăрçă участникĕсене, вĕсен тăлăх арăмĕсене тав сăмахĕ каларĕ, çавăн пекех ЧР Президентне, Республика Правительствине çурта тума пулăшнăшăн тав турĕ.
ЧР хула строительстви тата обществăлла аталану министрĕ А.Гончаров хваттер хуçисемпе пĕрле чунтан савăннине пытармарĕ, Вăрмар районĕнче влаç органĕсем çакăн пек килĕштерсе ĕçлесе пурăнни эффективлă кăтартусем патне илсе пынишĕн хĕпĕртерĕ вăл. Хваттер хуçисене Вăрмар район депутачĕсен Пухăвĕн депутачĕ, «Урмарская» коллективлă строительство организацийĕн тĕп инженерĕ И.Законов та саламларĕ.
Порфирьев урамĕнчи 24 хваттерлĕ çурта 2010 çулхи сентябрь уйăхĕнче «Урмарская» коллективлă строительство организацийĕ хăй шучĕпе хăпартма пуçланă. Пурăнмалли çуртăн пĕтĕмĕшле лаптăкĕ 1044 тăваткал метр, хăпартассин смета хакĕ 23289,6 пин тенкĕ.
РФ Президенчĕн «1941-1945 çулсенчи Аслă Отечественнăй вăрçă ветеранĕсене пурăнмалли çурт-йĕрпе тивĕçтересси çинчен» Указĕпе килĕшÿллĕн пурăнмалли çурта хăпартма е туянма пĕр хутчен паракан укçа илмелли свидетельствăсене усă курса 10929,6 пин тенкине тăкакланă. Çак кун Аслă Отечественнăй вăрçăн 12 ветеранĕ тата инваличĕ, вăрçăра вилнĕ участниксемпе инвалидсен çемье членĕсем хăтлă çĕнĕ хваттерсен хуçисем пулса тăчĕç.
«2008-2011 çулсенче граждансем Чăваш Республикин территорийĕнче вырнаçнă кивĕ тата авариллĕ пурăнмалли çурт-йĕр фондĕнчен куçасси» республикăри тĕллевлĕ программа шайĕнче ЧР бюджетĕнчен 11184,4 пин тенкĕ, район бюджетĕнчен 1200,0 пин тенкĕ уйăрнă. Кивĕ çуртсенче пурăннă 12 çемье çак çуртра пурăнма пуçларĕ.
Унтан яваплă çынсем «ОВАС» Вăрмарти çĕвĕ фабрики» тулли мар яваплă общество ĕçĕ-хĕлĕпе паллашрĕç.