28 июня 2011 г.
Республика кунне халалласа Шупашкарта вун-вун мероприяти иртнĕ. Июнĕн 23-мĕшĕнче кăна тĕп хулара 12 «çавра сĕтел» йĕркеленĕ.
«Инноваци бизнесне нанотехнологи сферинче йĕркелесси - теорирен практика таран» ятлине ЧР Президенчĕ М.Игнатьев уçнă. Унта РФ Патшалăх Думин депутачĕ К.Косачев, Федераци Канашĕн комитечĕн председателĕ Ю.Солонин, РФ Президенчĕн Атăлçи федераци округĕнчи полномочиллĕ представителĕн пулăшуçи М.Канкулов, бизнес, ăсталăх çыннисем хутшăннă.
Инноваци бизнесĕн калăпăшне 2015 çул тĕлне 8 миллиард тенке çитерме палăртнă, нанопродукципе усă курассине - 6 миллиарда.
«Раççей ăстисем» конкурс Шупашкарта 2003 çултанпа иртет. Унта чаплă маçтăрсен ĕçĕсемпе паллашма май пур. Çĕршывăн тĕрлĕ кĕтесĕнчен çитнĕ кунта ăстасем: Дагестан, Пушкăрт, Мари, Мордва, Калмăк, Коми, Тутар Республикисенчен, Киров, Воронеж, Белгород, Ульяновск облаçĕсенчен, Краснодар крайĕнчен. Курма килнисем чÿлмек, вĕтĕ шăрçапа хăлха çакки, тĕрĕ тĕрленине, пиçиххи явнине тата тĕрлĕ ал ĕçĕпе паллашма пултарнă.
Чăваш Енре кăçал Раççейĕн 24 регионĕнчен 27 коллектив тата Беларуç Республикипе Иран Ислам Республикинчен виçĕ ушкăн килнĕ. Çав шутра - Иранри халăх ташшисен «Сахара», Беларуçри «Щедрица» тата «Хамăр ял» ансамбльсем, Дагестан, Калмăк, Пушкăртстан, Мордва, Мари Эл, Карели республикисемпе Ульяновск, Псков, Липецк, Белгород... облаçĕсенчи коллективсем.
ЧР Президенчĕ М.Игнатьев Республика кунне халалласа Çĕрпÿ районĕнче ирттернĕ мероприятисене хутшăннă.