17 июня 2011 г.
Чăваш Ен Президенчĕ М.Игнатьев ЧР Министрсен Кабинечĕн членĕсемпе тата федераци ведомствисен территори органĕсен ертÿçисемпе канашлу ирттернĕ.
Пĕтĕм Раççейри ял Сапантуйне, Патăрьел районĕнчи Шăнкăртамра иртмеллискере мĕнле хатĕрленни çинчен культура министрĕ Р.Лизакова каласа панă.
Июнĕн 19-мĕшĕнче унта 25-30 пин çын пухăнмалла. Тĕп мероприятисем виçĕ концерт тата икĕ кĕрешÿ лапамĕсенче иртĕç. Ипподромра лашасен чупăвĕ пулать. Программа анлă: профессионалсен тата художество пултарулăх коллективĕсем Чăваш Енрен кăна мар, Тутарстанран та. Уйрăм лапамра Тутарстанри Нурлат районĕн халăх пултарулăх коллективĕ хăйĕн юрри-кĕввипе савăнтарĕ. Сапантуя çĕршывăн 20 регионĕнчен 500 ытла çын килмелле. Сувенирсен, ал ăстисен япалисен куравĕсем, спорт вăййисем иртĕç. Йĕркелĕхе полицин пысăк шайĕ, ятарлă ушкăнсем тивĕçтерĕç. «Уяв кăмăлне нимĕн те ан пăстăр, çавăнпа та мероприятисене яваплăха туйса йĕркелемелле», - тенĕ Президент.
Вăл çÿллĕ шайра иртесси пирки пĕр иккĕленÿ те çук.