31 мая 2011 г.
Май уйăхĕн 25-мĕшĕнче Чăваш наци библиотекинче Ульяновск облаçĕнче Чăваш Республикин Культура кунĕсене тата Пĕтĕм Раççейри Чăвашсен Акатуйне ирттерес ыйтусемпе пресс-конференци пулнă. Вăл июнĕн 1-4-мĕш кунĕсенче иртмелле. Хатĕрленÿ ĕçĕ еплерех пынипе ЧР Культура министрĕ Р.Лизакова, Ульяновск облаçĕн кĕпĕрнаттăрĕн наци ыйтăвĕсемпе ĕçлекен канашçи Р.Сафин, Ульяновск облаçĕн Халăх культурин центрĕн генеральнăй директорĕ Е.Сафронова, Чăваш Ен культура учрежденийĕсен директорĕ В.Бондарев тата ыттисем паллаштарнă.
Пĕтĕм Раççейри чăвашсен Акатуйĕ вăйă картипе уçăлĕ, Чĕмпĕрти В.И.Ленин ячĕллĕ тата «В.И.Ленин: 100 çул» лапамсенче иртĕ. Уява 85 пултарулăх коллективĕ хутшăнĕ. Вĕсенчен 30-шĕ Чăваш Енрен, 22-шĕ - Ульяновск облаçĕнчен, 33-шĕ - Раççейĕн ытти регионĕнчен тата ют çĕршывсенчен. Пултарулăх ушкăнĕсем Тюмень, Оренбург, Самар облаçĕсенчен, Пушкăртстанран, Тутарстанран, Эстонирен, Казахстанран, Беларуçрен, Америкăран килсе çитĕç.