31 мая 2011 г.
Предпринимательлĕх кунне Раççейре виççĕмĕш çул анлăн палăртаççĕ. Ăна аталантарма патшалăх çĕнĕрен те çĕнĕ майсем туса парать. Чылайăшĕсем харпăр хăй ĕçне пуçарса ярать. Пирĕн районта та предпринимательлĕх çирĕп аталанать. Уйрăм çын предпринимательсем 800, пĕчĕк тата вăтам предприятисем 122 шутланаççĕ. Пĕтĕмĕшле илсен районта ĕçлекен халăхăн 45 проценчĕ пĕчĕк тата вăтам бизнесра вăй хурать.
Ку хутĕнче те район предпринимателĕсене çÿллĕ шайра чысларĕç. Вĕсене халалланă уяв поселокри тĕп площадьре иртрĕ. Чи малтанах район администрацийĕн пуçлăхĕ К.Никитин предпринимательсен ячĕпе ăшă сăмахсем каларĕ. « Пирĕн районта вак предпринимательлĕх çулран çул вăй илсе пырать. Хальхи вăхăтра бизнеса çамрăксем аталантарни савăнтарать, паллах. Вĕсенче район шанчăкĕ, малашлăхĕ. Юлашки çул пирĕн тăрăхра бизнесăн тĕрлĕ енĕ аталанни куç кĕрет. Çавна май производствăра, ял хуçалăхĕнче, промышленноçра ÿсĕмсем пур. Вĕсем çĕнĕ технологисене пурнăçа кĕртме тăрăшаççĕ. Район администрацийĕ бизнеса аталантарма пур условисем те туса парать, çавăнпа та пĕр шикленмесĕр хăвăр палăртнă тĕллеве пурнăçа кĕртме пултаратăр. Сире пурне те уяв ячĕпе саламлатăп, çирĕп сывлăх сунатăп», - терĕ К.Никитин.
Вак тата вăтам бизнеса аталантаракансене çавăн пекех ЧР Патшалăх Канашĕн председателĕн заместителĕ Г.Васильев саламларĕ, ăнăçусем сунчĕ.
ЧР Патшалăх Канашĕн депутачĕ А.Разумов предприниматель паянхи вăхăтпа илсен тĕп сăнар пулнине çирĕплетрĕ.
Предпринимательлĕх ĕçĕнче пысăк ÿсĕмсем тунăшăн И.Михайлована, Г.Назарова район администрацийĕн Хисеп грамотине, çавăн пекех Г.Семенова, В.Иванов, Ю.Васильев, В.Сергеев, В.Табакова, И.Афиногенов, А.Иванов, А.Кудряшова, Н.Хованская, Л.Ларионова, О.Архипова уйрăм çын предпринимательсем Тав çырăвне тивĕçрĕç. Çавăн пекех «Единая Россия» партин пирĕн районти уйрăмĕн Тав çырăвне «Влад» тулли мар яваплă обществăн пуçлăхĕ В.Енькова, «Вăрмарти механика завочĕ» АУОн директорĕ О.Венедиктов, «Вăрмарти çĕвĕ фабрики «ОВАС» тулли мар яваплă обществăн директорĕ В.Лукин, «Светлана» тулли мар яваплă обществăн директорĕ С.Белоусова, «Нефть-Трэвел» тулли мар яваплă обществăн генеральнăй директорĕ В.Павлов тивĕçрĕç.
Раççей Перекет банкĕн Çĕрпÿри 4437 номерлĕ уйрăмĕн пуçлăхĕ О.Николин, «РОСГОССТРАХ» компанин Чăваш Енри филиалĕн Вăрмар поселокĕнчи страхлакан уйрăмĕн пуçлăхĕ И.Алексеева уяв ячĕпе саламларĕç, чи активлă клиентсене парнесем пачĕç. Район предпринимателĕсем ачасен правипе ĕçлекен Вăрмар районĕнчи уполномоченнăйпе В.Еньковапа пĕрле «Ачасене тата çемьене пулăшу паракан Вăрмарти центр» республикăри патшалăх учрежденине видеокамера, пылак çимĕçсем парнелерĕç, уйрăм çын предприниматель Ю.Степанов асăннă центра вунă пин тенкĕ пачĕ.
Уяв савăнăçлă концертпа вĕçленчĕ.