27 мая 2011 г.
2011 çулхи январь-март уйăхĕсенче Вăрмарти халăха ĕçпе тивĕçтерекен центр республикăри халăха ĕçпе тивĕçтерекен Ведомствăлла тĕллевлĕ программăпа килĕшÿллĕн граждансене обществăлла ĕçсене явăçтарас, вăхăтлăх ĕç вырăнĕсем тупса парассипе активлă ĕçлет.
Хальхи вăхăт тĕлне обществăлла ĕçсене хутшăнтарас тĕллевпе предприятисемпе 24 килĕшÿ тунă, вĕсене 84 çынна явăçтарнă. Çав шутран 16-шĕ ĕç укçине илнипе пĕрлех ĕçсĕр ларнăшăн паракан пособие те тивĕçнĕ. Ĕçлекенсенчен ытларахăшĕ - хĕрарăмсем. Укçа-тенкĕ енчен йывăр вăхăтра çакăн евĕрлĕ пулăшу вăхăтлăх пулин те, çемье бюджетне самай витĕм кÿрет. Ĕçсĕр граждансене вырнаçтарас тĕллевпе 2 предприятипе килĕшÿ тунă: «Ямал» тулли мар яваплă общество, Мăнçырмари ял тăрăхĕн администрацийĕ.
Çавăн пекех Вăрмарти халăха ĕçпе тивĕçтерекен центрăн ĕçĕнче чи пĕлтерĕшлĕ енĕсенчен пĕри вăл çул çитмен çамрăксене ĕçпе тивĕçтересси. 2011 çул тăршшĕпе 355 ачана ĕçе явăçтарас тĕллевпе 244,4 пин тенкĕ уйăрнă. Ватăсене килте пулăшассипе, ял тăрăхĕсене тирпей-илем кÿрессипе, çĕр улми лартассипе 11 килĕшÿ йĕркелесе вĕренÿрен пушă вăхăтра çул çитмен 210 ачана ĕçлеттернĕ. Вĕсенчен ытларахăшĕ ăнăçсăр, сахал тупăшлă, ĕçсĕр ларакан ашшĕ-амăшĕсен çемйисенчи ачасем. Çапла май уйăхĕн çурри тĕлне федераллă бюджетран уйăрнă укçа-тенкĕрен 108, 5 пин тенкине тăкакласа пĕтернĕ. Ĕçпе тивĕçтерекен центр çул çитмен ачасен ашшĕ-амăшĕсене те хутшăнтарма тăрăшать хăй пурнăçлакан программăсене. ЧР ĕç рынокĕнчи йывăр лару-тăрăва чакарас тĕллевпе 2011 çулта 5 ĕç вырăнĕ йĕркелеме, нумай ачаллă çемьери 5 ашшĕ-амăшне ĕçе вырнаçтарма палăртнă. Май уйăхĕ тĕлне 5 ĕç вырăнне йĕркеленĕ, анчах та вĕсенчен виççĕшне кăна йышăннă. Паянхи куна «Светлана» тулли мар яваплă обществăра 2 çĕвĕç вырăнĕ пур. Çавăн пекех ЧР халăха 20011-2013 çулсенче ĕçпе тивĕçтерекен Ведомствăлла тĕллевлĕ программăпа килĕшÿллĕн ĕç вырăнĕ тупайман граждансем (18 çул тултарман, нумай ачаллă е пĕччен ашшĕ-амăшĕсем) Мăнçырмари ял тăрăхĕн администрацийĕпе ял тăрăхне тирпей-илем кĕртес ĕçе хутшăнма килĕшÿ тунă. Çапла ку ĕçе 3 ашшĕ-амăшне вырнаçтарнă.
2011 çул тăршшĕпе ĕçсĕр юлнă 11 çынна ĕçе вырнаçтарма планланă, çак тĕллевпе 41,5 пин тенкĕ уйăрнă.