24 мая 2011 г.
Юр кайса пĕтнĕ хыççăн çурхи, çуллахи çулсемпе ачасемшĕн велосипедсемпе ăмăртса чупасси мĕне тăрать! Питрен вĕрекен уçă çил ирĕклĕхе пĕлтерсе уçăлтарать-çке. Вырăссен паллă классикне Н.Гоголе кăштах улăштарса «Раççейри мĕнле çын хăвăрт çÿреме юратмасть?», - тесе тепĕр хут та ыйтас килет те, анчах çул-йĕр правилисем пирки те асăрхаттарас килет. Велосипедпа урамсемпе çулсем тăрăх 14 çула çитмен ачасен çÿреме юрамасть. Ку - пурнăç ыйтăвĕ. Нумай ача-пăча çакна шута илмесĕр автотранспорт айне лекет. Тормоз тытмасть, руль лайăх ĕçлемест, фонарь çутатмасть, çутта сирсе яракан паллăсем çук пулсан, велосипед çине ларма юрамасть. Çавăн пекех çул хĕрринчен 1 метр шала кĕмелле мар, алăсене ирĕке ярса çул çинчи автомашинăсенчен çакланса пыни те йĕркене пăсни шутланать. Çавăн пекех велосипедпа унăн сарлакăшĕпе вăрăмĕшĕнчен, 1,5 ытларах тухса тăракан япаласене турттарма юрамасть.