24 мая 2011 г.
«Раççей юрисчĕсен ассоциацийĕ» пĕрлешĕвĕн регионти уйрăмĕн Вăрмарти тĕп библиотекăри консультаци пунктĕнче иртнĕ черетлĕ ларăвĕнче тĕпрен илсен çурт-йĕрпе коммуналлă хуçалăх системинчи электроэнерги тарифĕсем тавра калаçу пынă. Унăн ĕçне район прокурорĕн заместителĕ Г.Демьянов, «Вăрмар районĕнчи çурт-йĕрпе коммуналлă хуçалăх управляющи компанийĕ» тулли мар яваплă обществăн, «Чувашская энергосбытовая компания» АУОн ертÿçисем О.Викторов, А.Стерхов хутшăннă. Тĕл пулăва ытларах Вăрмар поселокĕнче пурăнакансем пынă май, калаçу нумай хваттерлĕ çуртсенчи электроэнергие шута илекен пĕтĕмĕшле счетчик тавра пынă.
Мĕн ытларах хумхантарать-ха çынсене? Мĕнпе вĕсем килешеççĕ, мĕнпе çук. Çак ыйтусене уçăмлату кĕртес тĕлĕшпе «Хĕрлĕ ялав» хаçат редакцийĕ те Г.Демьяновпа О.Викторова уçă калаçăва килме ыйтрĕ.
Вĕсем те çак ыйтусене пĕтĕмлетме тăрăшрĕç. Электроэнерги хакне районти службăсем çирĕплетмеççĕ. Нумай хваттерлĕ çуртсенче пĕтĕмĕшле, уйрăм хваттерсенчех хăйсен электроэнерги счетчикĕсем пулсан та уншăн тÿлес енĕпе йывăрлăхсем тухса тăраççĕ. Тÿрĕ кăмăллă мар хăш-пĕр çынсем электроэнерги вăрлани, кунĕн-çĕрĕн çунакан электрофонарьсем те тÿлев шутнех кĕрсе каяççĕ. Мĕншĕн-ха хăв кĕнĕ хыççăн подъездри хунара сÿнтерме çук? Ку енĕпе Çамрăксен урамĕнчи 6-мĕш çуртра пурăнакансем çаврăнăçуллă. Пус тенке перекетлет тенине лайăх ăнланса илнĕ, кунта пурăнакансем пухусем ирттерсе пĕрле тумалли ĕçсене палăртаççĕ.
Шыв ыйтăвĕ çуллахи вăхăтра çивĕч вырăна тухать - пĕрисем куç умĕнчех пахчана сапаççĕ, çав вăхăтрах çÿлти хутра пурăнакансем вăл çитменнипе тертленеççĕ.
Çивĕч ыйтусем питĕ нумай - шифер витнĕ çуртсен тăррисене антеннăсене пăрма ним уямасăр хăпарса каяççĕ - çумăр вăхăтĕнче хваттерсене шыв анма пуçлать. Айăпне вара коммуналлă службăсенче шыратпăр. Тĕрĕссипе ăна хамăрта шырани вырăнлах мар-ши? Ыйтусем нумай.