20 мая 2011 г.
«Илем» физкультурăпа спорт комплексĕнче шывра ишес енĕпе район администрацийĕн пуçлăхĕн Кубокне çĕнсе илессишĕн шкул ачисен Спартакиади иртнĕ. Ăна Аслă Çĕнтерÿ 66 çул тултарнине халалланă.
Ăмăртăва хутшăнакансене район администрацийĕн пуçлăхĕ К.Никитин, ЧР Патшалăх Канашĕн депутачĕ Г.Васильев, хамăр ентеш, виççĕмĕш рангри капитан, «Тăван çĕршыв ывăлĕсем» регионти обществăлла организацин представителĕ А.Воронин, районти шалти ĕçсен пайĕн начальникĕ И.Константинов, Аслă Отечественнăй вăрçă участникĕ В.Андреев, Вăрмар хула тăрăхĕн пуçлăхĕн заместителĕ Л.Голубева, Вăрмарти А.Ф.Федоров ячĕллĕ ачасемпе çамрăксен спорт шкулĕн директорĕ С.Архипов, «Илем» физкультурăпа спорт комплексĕн директорĕ О.Иванов Аслă Çĕнтерÿ кунĕпе саламланă, спортра ăнăçусем суннă.
Ăмăртусенче вăтам шкулсенче вĕренекен арçын ачасем 50 метра, хĕр ачасем 50 метра ишсе тупăшнă. Эстафетăра 2 хĕр ача тата 2 арçын ача 50 метра хăвăртрах ишсе тухассишĕн хăйсен мĕн пур вăй-халтан тупăшрĕç.
Пĕтĕмĕшле пĕлÿ паракан тĕп шкулсенче вĕренекен арçын ачасем - 50 метра, хĕр ачасем 25 метра ишсе тухнă. Эстафетăра 2 хĕр ача 25 метра, икĕ арçын ача 50 метра ишсе ăмăртнă.
Çапла вара кашни шкулăн командинче 8 спортсмен, 4 хĕр ача, 4 арçын ача пулнă.
Акă ăмăрту итогĕсем те паллă. Пĕтĕмĕшле пĕлÿ паракан тĕп шкулсемпе илсен уйрăм участниксенчен ирĕклĕ стильпе 50 метра ишсе Андрей Андреев (Кĕтеснер) чи мала тухнă. Иккĕмĕш вырăнта Виталий Поликарпов (Урнар), виççĕмĕшĕнче Денис Федоров (Чулкас) пулнă.
Хĕр ачасем 25 метра ишсе тупăшнă. Чи пултарулли Екатерина Васильева (Арапуç) пĕрремĕш вырăн йышăннă. Кристина Лингапа (Чупай) Дарья Васильева (Çĕнĕ Кинчер) иккĕмĕшпе виççĕмĕш вырăнсенче.
Вăтам шкулсенче вĕренекен арçын ачасем 50 метра ишсе тупăшнă. Кунта вара Пысăк Енккасси шкулĕнче ăс пухакансем чăннипех те тĕлĕнтернĕ. Малти призлă вырăнсене Г.Сидоров, С.Соколов, А.Иванов çĕнсе илнĕ.
Хĕр ачасенчен Вăрмарти пĕрремĕш вăтам шкулта вĕренекен Н.Чернова, О.Иванова, А.Грачева малти призлă вырăнсене тивĕçнĕ.
Эстафета тупăшăвĕ те интереслĕ пулнă. Тĕп шкулсенче вĕренекен 2 хĕр ача - 25 метр, икĕ арçын ача 50 метра ишнĕ. Ку хутĕнче Чупайсем çĕнтернĕ, Çĕнĕ Кинчерсем иккĕмĕш, Урнарсем - виççĕмĕш вырăнсенче.
Вăтам шкулсенчи спортсменсем 50 метра ишсе ăмăртнă. Çивĕч кĕрешÿре Вăрмарти пĕрремĕш вăтам шкула вĕренекенсем çĕнтернĕ. Пысăк Енккассисем иккĕмĕш вырăна тухнă.
Командăсемпе вырăнсене çапла пайланă: тĕп шкулсем хушшинче пĕрремĕш вырăна Чупайсем, иккĕмĕшне - Çĕнкинчерсем, виççĕмĕшне Урнарсем тухнă.
Вăтам шкулсенчен пĕрремĕш вырăна Вăрмарти пĕрремĕш вăтам шкул команди тухнă. Иккĕмĕшне - Пысăкенккассисем.
Çĕнтерÿçĕсене дипломсемпе наградăланă, хаклă парнесем панă.
Çав кун ăмăртăва хутшăнакансемшĕн чăн-чăн спорт уявĕ пулнă. Кун пек ăмăртусем малашне те пулĕç.