20 мая 2011 г.
Çулсерен виçĕ республика шайĕнче (Тутар, Чăваш Ен, Мари Эл) «Татчумари-2011» туристсен слечĕ иртет. Ку слета вĕрентекенсем хутшăнаççĕ. Кăçал ăна ирттерме пуçланăранпа 40 çул çитрĕ.
Атăлăн сылтăм çыранĕнчи Варламовка юхан шывĕ хĕрринче 21 ушкăн пуçтарăнчĕ: Тутар Республикинчен 5, Марисен 9, Чăвашсен 7 команди. Ăна йĕркелекенĕсем: ЧР Вĕрентÿпе çамрăксен политикин министерстви, Çут ĕçпе наука ĕçченĕсен профсоюз комитечĕ. Хамăр район командине йĕркелесе яма райадминистрацин вĕрентÿпе çамрăксен политикин пайĕн пуçлăхĕ Ю.Соколов тата профсоюз комитечĕн председателĕ Е.Николаева пулăшу пани хавхалантарчĕ. Çак слета хутшăнма 12 çын кăмăл турĕ. Вĕсем: Н.Авакова, Э.Борисова (Кавал), Н.Ульянова (Тикаш), Н.Кузьмина (Вăрмар), Р.Теплова (Аслă Чак), К.Васильев, Э.Филиппов (райадминистрацин вĕрентÿпе çамрăксен политикин пайĕ), А.Яковлев (Энĕшпуç), Е.Павлов (Пысăк Енккасси), А.Петров (Пинер), А.Павлов (Кĕлкеш), С.Агапов (Чулкас).
Уяв чаплă лару-тăрура уçăлчĕ. Хĕвеллĕ те савăнăçлă кун туристсене саламласа ăнăçусем сунма ЧР Вĕрентÿпе çамрăксен политикин министрĕ В.Иванов, унăн çумĕ С.Петрова, республикăри çут ĕçпе наука ĕçченĕсен профсоюз организацийĕн председателĕн çумĕ М.Федоров тата ыттисем те килсе çитрĕç. Чăвашсем хăйĕн юрри-ташшипе, кăпăклă сăрипе сăйларĕç.
Уйăрса панă лаптăка вырнаçнă хыççăнах ăмăртусем пуçланчĕç. Туристсен тĕрлĕ конкурссем витĕр тухма тиврĕ: тавра пĕлÿпе экологи викторини, капитансен ăмăртăвĕ, туристсен хăнăхăвĕ, «Визитка», «Турпоход çинчен отчет», «Спорт ориентирĕ».
«Татчумари» - Тутар, Чăваш Ен, Мари Эл вĕрентекенĕсем хушшинче туризм енĕпе ирттерекен турнир. Вăл кăçал 40-мĕш хут иртрĕ, ăна черетпе ЧР Вĕрентÿпе çамрăксен политикин министерстви йĕркелесе ирттерчĕ.
Виçĕ кун туристсемшĕн çăмăлах пулмарĕ пулсан та, сисĕнмесĕрех иртсе кайрĕ. Кану саманчĕсене те усăллă ирттерме тăрăшрĕç вĕрентекенсем. Каçсерен кăвайт умĕнче туссемпе юрăсем юрлани туслăха татах çирĕплетрĕ. «Çĕр сум пуличчен çĕр тус пултăр» - тени куç кĕретех. Чăвашсем пур халăхпа та туслă пурăнма тăрăшни пĕр-пĕрне йывăр вăхăтра пулăшнинче курăнчĕ. Педагогсем вĕрентÿ ĕçĕнче кăна мар, спортра та пултаруллă пулнине тепĕр хут ĕнентерчĕç. 6 Хисеп хучĕпе таврăнчĕç туристсем: экологипе (Н.Кузьмина, Р.Теплова) - 2, краеведенипе (Н.Авакова, Э.Бормисова) - 3, турпоход çинчен отчет-портфолио хатĕрлесе (С.Агапов, Э.Бормисова) 3 вырăнсем йышăнчĕç. Çакăн пек ăмăртусене хутшăнни вĕрентекене малалла творчествăлла ĕçлеме, пысăк ÿсĕмсем тума пулăшасса шанас килет. Çирĕп сывлăх, вăй-хăват сунатпăр спортсменсене. Çитес çул та Мари Эл çĕрĕ пирĕн туристсене тараватлăн кĕтсе илессе шанатпăр.