20 мая 2011 г.
Шкул ачисен çуллахи канăвĕ пуçланас вăхăт çывхарса килет. Вĕсен çуллахи канăвне йĕркелекен яваплă орган пирĕн районта – райадминистрацин вĕрентÿпе çамрăксен политикин пайĕ.
Район территорийĕнче ача-пăча лагерĕ пурри, ăна çулран çул юсаса - сыхласа хăварни нумайăшĕшĕн пысăк пĕлтерĕшлĕ. Ачана лагере канма ярас текен ашшĕ-амăшĕсем, сывлăха çирĕплетес текен ачасем чылай. Хальлĕхе райадминистрацин вĕрентÿпе çамрăксен политкин пайĕнче ашшĕ-амăшĕсенчен 176 заявлени йышăннă. Ачасен сывлăхне çирĕплетмелли «Романтика» лагерь кăçал та яланхи пекех 3 сменăпа йышăнма хатĕрленет шкул ачисене.
Малтанхи 2 сменăра хамăр районти ачасем кăна канĕç унта. Пĕр смена 70 ача йышăнма пултарать. Канас текенсем вара чылайрах. Кăçал та нумай ачаллă, сахал тупăшлă, ăнăçсăр çемьесенче çитĕнекенсем «Ачалăх ячĕпе, ачалăхшăн» ыр кăмăллăх марафонĕн шучĕпе канĕç. Çакăн пек çемьесен путевка хакĕн 5 процентне тÿлемелле. Путевкăн тулли хакĕ 7 пин те 700 тенкĕ. Июнĕн 10-мĕшĕнче «Романтика» пĕрремĕш сменине уçĕ. Хальлĕхе унта пысăк активлăхпа юсав ĕçĕсем пыраççĕ, вĕсене майăн 20-мĕшĕччен вĕçлеме палăртнă.
Çавăн пекех шкул çумĕнче те сывлăха çирĕплетмелли лагерьсем йĕркеленĕç. Пĕр смени 18 куна тăсăлать. Шкул çумĕнчи лагере çÿрекен ачасене апатлантарма кунсерен 60 тенкĕ таран уйăрма палăртнă. Çакăн пек лагерьсене районти 8 шкул çумĕнче уçĕç. Вожатăйсем ачасене кану йĕркипе тĕрлĕ енлĕ аталантарĕç, сывлăха çирĕплетмелли мероприятисене активлă явăçтарĕç. Çавăнпа та ачасем лагерьсенче сывлăхне кăна çирĕплетмĕç, тавра курăмне те аталантарĕç.