20 мая 2011 г.
Тăван çĕршыва хÿтĕлесси мĕн авалтан чыс, хисеп пулнă. Мăн асаттесемпе аттесем иртнĕ ĕмĕрсенчи вăрçăсенче çĕршыв ирĕклĕхĕшĕн çапăçнă, чылайăшĕ паттăрсен вилĕмĕпе вилнĕ. Тăван çĕршыв умĕнчи тивĕçе чыслăн пурнăçласси Раççей салтакĕшĕн хальхи вăхăтра та тĕп тĕллевсенчен пĕри пулса тăрать. Çакна çар ретне тăма хатĕрленекенсем яланах асра тытаççĕ. Çурхи призыв пуçланнă май ЧР Çар ĕç комиссариачĕн Вăрмар тата Куславкка районĕсен пай пуçлăхĕ М.Пуклаков палăртнă тăрăх, кăçал икĕ районпа пурĕ 160 яш çар ретне тăмалла.
Хальхи вăхăтра 35-шĕ хăйсен тивĕçне чыслăн пурнăçласа пыма тытăннă та ĕнтĕ. Акă иртнĕ кунсенче 10 çамрăк (Вăрмартан - 6, Куславккаран - 4) пултаруллисемпе хăюллисен ретне тăчĕç. Призывниксене Михаил Анатольевич Пуклаков çар ретне тăнă ятпа саламларĕ. «Салтак чĕри хурçă чĕре. Мĕн авалтан чăваш салтакĕ паттăрлăхĕпе, çирĕплĕхĕпе, чăтăмлăхĕпе палăрса тăнă, эсир те çавăн пек пулма тăрăшăр. Ырă, сывă пурнăç йĕркине тытса пыни сире çар ретĕнче те ÿсĕмсем тума пулăшĕ. Хăвăр тивĕçе чыслăн пурнăçласса шанса тăратăп. Сире Тăван çĕршывшăн сыхă тăма çирĕп сывлăх, телей сунатăп», - терĕ М.Пуклаков пулас салтаксене ырă çул сунса.
Салтак вутра пиçĕхет, çумăрпа чÿхенет, çилпе типет, сивĕре уçăлать, çавăнпа паттăр пулать. Пĕр çулталăк службăра хăйсен тивĕçне тÿрĕ кăмăлпа пурнăçлама тивет вĕсен. Иртнĕ çулсемпе танлаштарсан салтаксем хăйсен çар тивĕçĕсене пурнăçласси çине ытларах тимлĕх уйăрĕç. Малашлăхра салтаксене апатлантарассине çар службинче тăман граждансем пурнăçласа пырĕç.
Хĕсметре паттăрлăхпа тата хăюлăхпа палăрнисем служба вĕçленсен малашлăхра контракт çырса юлма пултараççĕ. Унтан çар училищисене кĕме кăмăл тăвакансем валли çул уçă. Иртнĕ çул пирĕн районтан аслă çар училищисене 3 çамрăк вĕренме кĕнĕ. Ятарлă вăтам пĕлÿ паракан çар училищисене кăçал 8 ача вĕренме кĕме хатĕрленет. Вĕсем пурте Раççей çар службинче хăйсен тивĕçне тÿрĕ кăмăлпа пурнăçланă. Михаил Анатольевичпа калаçнă май çакна та пĕлтĕм: хĕрÿ вырăнсене çамрăк каччăсене контракт çырсан кăна яраççĕ.
Ятарлă специальноç илни те салтакра пысăк пулăшу парать. Калăпăр ДОСААФ автошкулне пĕтернисем водитель пулса службăра тăма пултараççĕ. Кăçалхи призыври яшсенчен çирĕм проценчĕ аслă пĕлÿллисем шутланаççĕ, çавăн пекех техникумсенчен вĕренсе тухнисем те сахал мар. 18 çулхисем - пурĕ 35 процент.
«Тăван çĕршыва хÿтĕлекенсен çирĕп сывлăхлă та патвар пулмалла. Çавăнпа та шкул саккинченех ырă, сывă пурнăç йĕркине тытса пымалла, физкультурăпа тата спортпа туслă пулмалла», - терĕ М.Пуклаков. Эппин салтак ретне тăма хатĕрленекенсен çакна яланах асра тытас пулать.