20 мая 2011 г.
«Шигали» хуçалăх ĕçченĕсемшĕн халĕ хĕрÿ тапхăр. Вĕсем хĕвелпе пĕрлех ака-сухана тухаççĕ. Çурхи кун çулталăк тăрантарать тенĕрен хуçалăх ĕçченĕсем те уяр çанталăкăн кашни сехечĕпе туллин усă курма тăрăшаççĕ. Хуçалăхăн 2110 гектара яхăн çĕр. Çав шутран кĕрхисем 480 гектар йышăнаççĕ, 320 гектар - нумай çул ÿсекен курăксем. Çурхисене пĕр 800 гектар ытла акма палăртнă.
Хальхи вăхăтра Шăхаль тăрăхĕнчи уйсенче ĕç шавĕ кĕрлесе тăрать. Çур акине кĕске вăхăтра тата пысăк пахалăхпа вĕçлессишĕн тăрăшаççĕ Шăхальсем. Ку хуçалăхра ĕçе пĕлсе, малашлăха пăхса ĕçлеççĕ. Нумай çул ÿсекен курăксене сÿреленĕ, кĕрхисене апатлантарнă. Çĕр пулăхне лайăхлатма, тухăçлă тыр-пул илме удобрени хывнă. Эпир пынă вăхăтра çурхи тулă анинче В.Петров механизатор МТЗ-82 тракторпа акать. Ăна çак ĕçре Ю.Данилов, С.Пуклаков сеяльщиксем пулăшса пыраççĕ. Н.Долгов водитель ГАЗ-53 автомашинăпа, Н.Тапинов тракторист МТЗ-82 тракторпа акакан агрегатсене вăрлăхпа тата минераллă удобренисемпе вăхăтра тивĕçтереççĕ. Туслă коллективра ĕç кал-кал пыни каламасăрах курăнать. «Кунне 70-80 гектара яхăн тырă акатпăр. Çанталăкĕ лайăх тăрсан çак кунсенче акана вĕçлетпĕр, - теççĕ хуçалăх ĕçченĕсем.
- Кăçалхи çур акине ирттерме тĕплĕн хатĕрлентĕмĕр. Çунтармалли-сĕрмелли материалсем, минераллă удобренисем çителĕклĕ кÿрсе килнĕ.
Пурлăхпа техника базине те çулсерен пуянлатса пыратпăр. Хăвăрах куратăр - уйра çĕнĕ МТЗ-82 тракторсем ĕçлеççĕ. Унсăр пуçне вăрлăх пахалăхĕ çине уйрăмах тимлĕ пăхатпăр. Çĕнĕ сортсемпе (çурхи тулă «Маргарита», «Тулайковская-10», урпа «Эльф») ĕçлеме тăрăшатпăр, вĕсене çулсерен çĕнетсе тăратпăр. Пахалăхлă вăрлăх акса çеç тухăç илме пултарнине ĕçре тĕпе хуратпăр. Пĕлтĕр шăрăх çанталăкра та вăтам тухăç пуçтарса илтĕмĕр. Кăçал тĕллевсем пирĕн татах та пысăкрах, тухăç пĕлтĕрхинчен чылай ытларах илес шанăç пур. Акă, курăр-ха, кĕрхисем епле аван хĕл каçнă, куçа савăнтараççĕ, - терĕ хуçалăх ертÿçи А.Ульянов пире кĕрхисене кăтартса çÿренĕ май. Чăнласах Шăхальсен кĕрхисем парка çитĕннĕ. Çурхи çилпе лăпкăн хумханакан симĕс калчасене курсан пĕтĕм чуна ăшă туйăм çупăрларĕ, чĕрере савăнăç туйăмĕ çуратрĕ. Çĕр ĕçченĕн кун каçипе ырми-канми ĕçлени сая кайман. Кĕркунне çеç çак пуянлăха пÿлмене типтерлĕ пуçтарса кĕртсен ял çынни хăйĕн ĕçĕпе кăмăллă пулĕччĕ. Çапла пултăр та.