17 мая 2011 г.
Партин «Раççейĕн кăнтăр пайне аталантарасси» конференцийĕнче «Единая Россия» парти председателĕ В.Путин «Единая Россия» партине обществăн сывă вăйĕсене Халăх фронтне пĕрлештерме сĕнÿ панă.
«Декабрьте Патшалăх Думин суйлавĕ пулать. Парти программа тăратĕ, унта çĕршыври кашни регион тăрăх ĕçлемелли предметлă план пулĕ. Кадрсен лифчĕ ĕçлеме пуçлани пире питĕ кирлĕ. Кадрсене августчен пухса çитермелле, сентябрьте партин суйлав умĕнхи списокне йĕркелеме май пултăр. Кандидатсене сÿтсе явнă çĕре партине кĕмен, анчах парти майлă çынсен те хутшăнмалла.
Халăх анлă фронтне йĕркелеме сĕнетĕп. Мĕн пур политика вăйĕсем тăрăшнине пĕрлештермелли çакнашкал майпа тĕрлĕ çĕршывсенче тата тĕрлĕ политика вăйĕсем - сылтăмрисем те, сулахайрисем те, патриотсем те усă кураççĕ. Ку вăл шухăш-кăмăл тĕлĕшĕнчен çывăх тăракан политика вăйĕсене пĕрлештермелли хатĕр пулать. Партие тата обществăлла организацисене, çĕршыв пурнăçне лайăхлатас тĕллевлĕ мĕн пур çынсене пĕрлештерес килет. Ку пĕрлешÿ «Пĕтĕм Раççейри халăх фрончĕ» ятлă пулĕ. Ун тăрăх партине кĕмен кандидатсем Думăна «Единая Россия» парти списокĕ тăрăх кĕрсе кайма пултарĕччĕç», - тенĕ Путин.
Волгоград округĕнчи конференци «Единая Россия» партин округсенчи регионсен, федераллă округсен тата çĕршывăн 2020 çулчченхи аталанăвĕн стратегилле проекчĕсене сÿтсе явакан форумсенчен улттăмĕш пулнă. Çак опыта пĕтĕмлетсе В.Путин РФ Правительстви çумĕнче Стратегилле пуçарусен агенстви йĕркелеме те сĕннĕ: «Чи пысăк тĕллев - регионсен, муниципалитетсен пуçарăвне ырласси тата аталану стратегине хатĕрлесси. Юлашки 10 çул хушшинче эпир çĕршыва аталантармашкăн сахал мар турăмăр, çакă пире кризиса çăмăллăнрах тÿссе ирттерме май парать. Хальлĕхе эпир экономикăн иккĕ виççĕмĕш пайне çĕклеме пултартăмăр, аталанăвăн çĕнĕ тапхăрĕ вара халех пуçланать. Эпир федераци шайĕнчен çĕнĕ экономика çине куçнине пулăшса пама тăрăшатпăр, анчах çак куçăм хăвăртлăхĕ пире çырлахтармасть. Ун валли пирĕн конференцисен результачĕсемпе усă курма пулать.
Эпир кашнинчех пултаруллă çамрăк çынсем тăратакан çĕнĕ инвестпроектсемпе паллашатпăр. Анчах кунта çынсем ыйтакансем пулса тăраççĕ, мĕншĕн тесен социаллă лифтсем япăх ĕçлеççĕ. Çамрăк çынсен хуллен кăна хускалса пыма тивет.
РФ Правительстви çумĕнче Стратегилле пуçарусен агентстви йĕркелеме сĕнетĕп, унта эпир чи ăнăçлă ĕçлекен компанисене явăçтарма, конференцире сăмах тухса каланă çынсене чĕнме пултарăттăмăр. Яланхи хутшăну валли майсем тумалла. Эпĕ агенствăн ĕçĕ-хĕлĕн виçĕ çул-йĕрне сĕнетĕп: çĕнĕ бизнес, çамрăк профессионалсем тата социаллă проектсем. Çамрăк менеджерсене социаллă сектора тытса пыма сĕнмелле».
Парти лидерĕ паян çĕршывра сывлăх сыхлавĕпе вĕрентÿ модернизацийĕн анлă проекчĕсем пурнăçланса пыни, 2012 çултан пуçласа вара культурăна пулăшмалли программа старта тухасси пирки аса илтернĕ:
«Çĕршыври граждансен ытларах пайĕн интересĕсем пирки сăмах пырать. Эпир ку проектсем валли малтан палăртнă укçа-тенкĕсĕр пуçне тата самаях пысăк суммăсем хушса паратпăр. Çынсен çакна хăйсен туйса илмелле, пулăшусен пахалăхĕ паянхинчен чылай çÿллĕ шайра пултăр, поликлиникăсенче черетсем ан пулччăр, пирĕн шкулсемпе библиотекăсенче йĕркеллĕ оборудовани лартăр, культура, вĕрентÿ тата сывлăх сыхлавĕн сферисенче вăй хуракан специалистсем вара тивĕçлĕ ĕç укçи илччĕр».