17 мая 2011 г.
Волейбол районта чи лайăх аталаннă спорт тĕсĕсенчен пĕри. 1966 çултах республикăра хĕллехи III тата çуллахи IV спартакиадăсем ирттернĕ.
Çивĕч кĕрешÿре Вăрмарсен волейбол команди пĕрремĕш вырăн йышăннă. Унтан маларахри çулсенче те район чысне Зосим Романов, Алексей Жуковский, Александр Васильев, Юрий Исаев, Меркурий Петров, Геннадий Николаев волейболистсем пултаруллăн хÿтĕленĕ. Хальхи вăхăтра та шкул ачисем хушшинче волейбол спортне аталантарасси паллă вырăн йышăнать. И.Алешин тренер тăрăшнипе çамрăк волейболистсем республикăра ирттерекен ăмăртусенче те призлă вырăнсене çĕнсе илеççĕ.
Районти Спорт çуртĕнче волейбол ветеранĕсене М.Степановпа В.Семенова халалласа 1997 çулта çуралнă тата унтан та çамрăкрах спортсменсем хушшинче волейболла выляс енĕпе уçă турнир ирттернĕ. В.Петров врач спонсор пулса пулăшнипе ăмăрту активлăхпа палăрса тăнă. Турнира Чулкас, Тикаш, Арапуç, Шăхаль, Кĕтеснер, Вăрмарти пĕрремĕш вăтам шкул командисем хутшăннă. Çивĕч кĕрешÿре пĕрремĕш вырăна Чулкассем çĕнсе илнĕ. Тикашсемпе Арапуçсем - иккĕмĕшпе виççĕмĕш вырăнсенче.