17 мая 2011 г.
Республикăра çуркуннехи «Йывăç кунĕ» акци иртнĕ май поселокра, районти нумай ял тăрăхĕсенче йывăç лартас ĕç пырать.
Акă Чупайĕнчи пĕтĕмĕшле пĕлÿ паракан тĕп шкулти «И.Я.Яковлев калчисем» ачасен обществăлла пĕрлешĕвĕн членĕсем çак акцие хутшăнчĕç. Кашни çулах йывăç лартаççĕ вĕренекенсем. 2006 çултанпа шкул хыçĕнчи стадионта хурăн ращи çитĕнет. Унта халĕ 3 пин ытла йывăç ĕнтĕ. Иртнĕ çуркунне стадионтах Афган вăрçине хутшăннисем, вĕсен тăванĕсем, шкулта вĕренекенсем хырпа чăрăш хунавĕсене лартса Ас тăвăм аллейи уçнăччĕ. Майăн 10-мĕшĕнче акцие малалла тăсса питомникре 500 хыр тата 200 лиственница хунавĕсем лартнă. Çавăн пекех «Урмарская» ăратлă кайăк-кĕшĕк фабрики» АУО пиншер тĕп хырпа чăрăш хунавĕсем туянса кунта ĕçлекенсем, район администрацийĕнче тата ял тăрăхĕнче вăй хуракансемпе пĕрле Кивĕ Вăрмарти вăтам шкулта вĕренекенсем тавралăх ешертĕр тесе пысăк ĕç туса ирттерчĕç. Вăрмар поселокĕнче те çулсерен йывăçсем йышăнакан лаптăксем ÿссех пыраççĕ. Район, хула тăрăхĕн администрацийĕсен, Культурăпа кану центрĕн, тĕп библиотека, музей ĕçченĕсем, поселока хитререх курас текен граждансем тăрăшнипе 2 пин ытла тĕп хырпа хурăн тĕммисем лартрĕç. Районти шкул ачисен тÿпи тата та пысăк - вĕсем пиншер хунава пурнăç пачĕç.