17 мая 2011 г.
Тикашри «Передовик» тулли мар яваплă общество (пуçлăхĕ В.Кандаков) çур акине тĕплĕн хатĕрленнĕ. Паха вăрлăх тата çунтармалли-сĕрмелли япаласем кирлĕ чухлĕ хатĕрленĕ. Пурĕ 350 гектар çĕр шутланать вĕсен.
- Çĕр пиçсе çитнине кура кăçал пирĕн 150 гектар тулă акса хăвармалла, ытти урпа тата çĕр улми пулмалла. Тухăçа ÿстерме паха вăрлăха минераллă удобренисемпе явăштарса акатпăр, - тет общество пуçлăхĕ Виктор Федорович.
Хальхи вăхăтра мĕн иртен пуçласа сĕм çĕрлеччен ĕç шавĕ кĕрлесе тăрать. Михаил Ленский механизатор хăйне шанса панă техникăна тухăçлă ĕçлеттерет. Сергей Харитонов, Юрий Едюков, Александр Деряков, Александр Шапеев сеяльщиксем ĕç пахалăхĕ çине уйрăмах тимлĕ пăхаççĕ. Вĕсем кашни çур акинчех пысăк хастарлăх кăтартаççĕ. Мария Ленская повар уй-хир ĕçченĕсене тутлă апатпа тивĕçтерет.
- Ирхи тĕш тырă культурисене паян-ыран акса пĕтеретпĕр, - теççĕ çĕр ĕçченĕсем.
Сеялкăна вăрлăхпа тата минераллă удобренипе тултарчĕç те сеяльщиксем, трактор ял çумĕнчи ферма çывăхĕнчи Сăхăт юхан шывĕ çумĕнчи участок еннелле тапранса та кайрĕ.