17 мая 2011 г.
М.Игнатьев Президент ертсе пынипе Министрсен Кабинечĕн ларăвĕнче социаллă пурнăçпа экономикăна пырса тивекен нумай ыйтăва тишкернĕ.
Унта Чăваш Республикин 2011-2012 çулсенчи потребитель карçинкки çинчен калакан саккун проектне ырланă.
Республикăра нумай ачаллă çемьесене çĕр лаптăкĕсемпе тивĕçтересси çинчен калакан саккуна пурнăçласа пурлăх министрĕ С.Енилина асăннă тĕллев валли районсемпе хуласенче 177 лаптăк - пĕтĕмпе 34 гектар - уйăрни çинчен пĕлтернĕ. Çав шутран 23 гектарĕ кăна муниципалитетсен харпăрлăхĕнче. Нумай ачаллă çемьесене вара саккунпа килĕшÿллĕн шăпах муниципалитет çĕрне памалла (тĕплĕнрех çак ыйтупа çырнă материалпа 2 страницăра паллашма пултаратăр). «Ют» çĕр лаптăкĕсене муниципалитет харпăрлăхне куçарса аппалансан çемьесене çĕр парасси тата 2-2,5 уйăха тăсăлса каять, çавăнпа министр саккуна улшăну кĕртме, асăннă çĕрсене муниципалитетсене парса тăмасăрах валеçме сĕннĕ. Сывлăх сыхлавĕпе социаллă аталану министрĕ В.Муллина медицинăна çĕнетмелли программăпа килĕшÿллĕн амбулатори пулăшăвĕпе усă курассине лайăхлатассипе çыхăннă йĕркепе паллаштарнă. Çакă амбулатори тытăмĕнче вăй хуракан врачсен ĕç укçине тивĕ - вăл кăçал 10 процент патнелле ÿсмелле, ÿсĕм çитес çул вара пĕтĕмĕшле 27 процентпа танлашмалла.
Унсăр пуçне кун ыйтăвĕнче тăракан нумай пĕлтерĕшлĕ ыйтусене сÿтсе явнă.