13 мая 2011 г.
Ачасен Вăрмарти искусство шкулĕнче Раççей Космонавтикин çулталăкне халалласа кунти хĕлĕхлĕ халăх инструменчĕсемпе каламалли уйрăмĕн вĕрентекенĕсемпе вĕренекенĕсен отчетлă концерчĕ иртрĕ. Художество пайĕн вĕренекенĕсем «Çăлтăрлă çул» ятарлă курав йĕркеленĕ.Чи малтанах ачасем, вĕсен ашшĕ-амăшĕсем, преподавательсем умĕнче искусство шкулĕн преподавателĕ Л.Ковалевская тухса калаçрĕ. Унтан «Ытарайми янăравлă хĕлĕхсем» конкурса хутшăнакан ансамбльсене савăнăçлă лару-тăрура 1-3 степеньлĕ дипломсемпе наградăланă.
З.Румянцева, М.Михайлова, И.Филиппов преподавательсен кашни кунхи профессиллĕ ĕçĕ, çак уйрăмра вĕренекенсен тăрăшулăхĕ, çирĕп тĕллевлĕхĕ отчетлă концерта хĕлĕхлĕ халăх инструменчĕсен вăййин чăн-чăн уявне çавăрчĕ. Сцена çине тухакан кашни участникех, гитарăпа тин кăна калама вĕреннĕскер-и вăл е республика шайĕнчи конкурссен лауреачĕ-и, хăйне çирĕп, эмоциллĕ тытрĕ. Вĕсене итлекенсем тăвăллăн алă çупрĕç.
С.Максимов тата Ф.Павлов ячĕллĕ хĕлĕхлĕ халăх инструменчĕсемпе каламалли республикăри 5-мĕш конкурсăн дипломанчĕ И.Иванов, ял çамрăкĕсем хушшинче художествăлла пултарулăх енĕпе иртнĕ «Хавхалану» республикăри 5 фестивалĕн лауреачĕсем И.Иванов, Ф.Федоров, Т.Тимофеева, М.Голубева, регионсем хушшинче çамрăксен «Ритм» 2-мĕш фестивалĕн лауреачĕсем А.Иванова, Н.Кузнецова, Н.Степанова хăйсен кăтартăвĕсемпе савăнтарчĕç.