13 мая 2011 г.
Раççей Федерацийĕн Президенчĕ 2010 çулхи июлĕн 30-мĕшĕнче йышăннă «2010-2011 вĕренÿ çулĕнче шкул ачисем хушшинче Пĕтĕм Раççейри «Президент ăмăртăвĕсем» ирттересси çинчен» Указа пурнăçласа кăçалхи январь-февраль уйăхĕсенче районти пур шкулсенче те спорт ăмăртăвĕсем йĕркелерĕç.
Мероприятин тĕллевĕ - шкул ачисене физкультурăпа спорта юратма хăнăхтарасси, çамрăкăн сывлăхне çирĕплетесси, сывă пурнăç йĕркине тытса пырасси, физкультурăпа спорта пропагандăласси. Майăн 4-мĕшĕнче шкулсен командисем районти спорт çуртне пухăнчĕç. Пурĕ 17 команда, 150 ача, пурте 7-мĕш класра вĕренекенсем. Кашни командăрах 10 спортсмен: 5 хĕр ача, 5 арçын ача.
Çамрăк спортсменсем районти спорт çурчĕн залĕнче пуçтарăнчĕç. Ăмăртăвăн тĕп судйи А.Ф.Федоров ячĕллĕ ачасемпе çамрăксен спорт шкулĕн директорĕ С.Архипов спортсменсем ăмăртăва хатĕрри çинчен район администрацийĕн пуçлăхĕн заместительне, райадминистрацин вĕрентÿпе çамрăксен политикин пайĕн начальникне Ю.Соколова рапорт парать.
- Паян пирĕншĕн пысăк уяв. Эсир «Президент ăмăртăвĕсене» хутшăнса хăвăр сывлăха çирĕплететĕр, спортри ăсталăха туптатăр. Районта чапа тухнă пултаруллă спортсменсем сахал мар. Сирĕн вĕсенчен тĕслĕх илмелле, çавсем пек пулма тăрăшмалла, - терĕ Юрий Васильевич.
Сергей Витальевич тĕп судья ăмăрту йĕркипе паллаштарать. Пурĕ 7 тĕрлĕ спорт енĕпе тупăшмалла. Спорт çурчĕн залĕнче арçын ачасен турник çинче туртăнмалла. Хĕр ачасен çĕртен тĕртенсе алă вăйĕпе темиçе хут çĕкленмелле. Арçын ачасемпе хĕр ачасен вырăнтан тăршшĕне сикмелле тата ытти те. Унтан стадионта 60 тата 1000 метрлă дистанцисене çуран чупса ăмăртмалла.
Акă, ăмăртусем пуçланчĕç. Спорт çуртĕнче судьясем тĕрлĕ ăмăртусем йĕркелерĕç. Çивĕч тупăшусене пăхма питех те интереслĕ пулчĕ. Спортăн пилĕк тĕсĕпе тупăшрĕç-çке.
Унтан пурте стадиона тухрĕç. Çанталăкĕ пĕлĕтлĕ пулчĕ пулин те çамрăксен кăмăлне хуçаймарĕ вăл. Кашниех çĕнтерÿшĕн хастар кĕрешрĕ. 1000 метрлă дистанцие хăвăртрах чупса тухас енĕпе Мăнçырма шкулĕнчи Дима Белов лайăх результат кăтартрĕ.
Тупăшусем вĕçленчĕç. Çивĕч кĕрешÿре Пысăк Енккассинчи вăтам шкулăн туслă команди, 1924 очко пухса, пĕрремĕш вырăн йышăнчĕ. Шкул чысне Никита Никитин, Геннадий Егоров, Костя Егоров, Саша Васильев, Денис Константинов, Кристина Кириллова, Настя Ильина, Тася Егорова, Алена Васильева, Лена Иванова пултаруллăн хÿтĕлерĕç.
Иккĕмĕш вырăна Чупай, виççĕмĕшне Пинер шкулĕсен командисем йышăнчĕç.
Уйрăм спортсменсенчен малти призлă вырăнсене Алексей Иванов (Кĕлкеш), Алик Дмитриев (Кĕтеснер), Николай Крылов (Чупай), Кристина Кириллова (Пысăк Енккасси), Снежана Александрова (Чупай), Татьяна Степанова (Пинер) çĕнсе илчĕç.
Çĕнтерÿçĕсем Грамотăсене тивĕçрĕç. Пысăк Енккассинчи вăтам шкулăн çĕнтерÿçи команди кăçалхи июнь уйăхĕнче Шупашкарта ирттерекен виççĕмĕш тапхăрти ăмăртусене хутшăнать. Пултаруллă спортсменсене ăнăçусем сунатпăр.