13 мая 2011 г.
Район шайĕнче Вăрмарти «Ромашка» 4-мĕш номерлĕ ача садĕнче «Ăслă ача - 2011» интеллектуаллă вăйă иртрĕ. Унăн тĕллевĕ шкул çулне çитмен ачасене хăйсем тĕллĕн вĕренме явăçтарасси, вĕсен шухăшлавне, интеллектуаллăхне аталантарасси.
«Ăслă ача – 2011» интеллектуаллă вăйă икĕ тапхăрпа иртрĕ. Пĕрремĕшĕ - апрелĕн 1-18-мĕшĕсенче районти шкул çулне çитмен ачасен вĕрентÿ учрежденийĕсенче пулчĕ (пурĕ 17 вĕрентÿ учрежденийĕ хутшăннă), иккĕмĕшĕ Вăрмарти «Ромашка» 4-мĕш номерлĕ ача садĕнче.
Конкурсантсен портфолиовĕсене тишкернĕ хыççăн комисси членĕсем чи нумай балл пухнă 7 ачана суйласа илнĕ.
2011 çул Космонавтика çулталăкĕ пулнă май çак мероприяти те космос тематикипе çыхăнса иртрĕ. Ачасен пултарулăхне, тавçăрулăхне палăртакан тĕрлĕрен конкурссем пулчĕç: «Хăвăн çинчен каласа пар», «Экологи», «Кăсăклантаракан математика», «Тавралăхпа паллашасси», ÿкерчĕк конкурсĕсем - «Космос», «Музыка». Вĕсене пĕтĕмлетнĕ май «Ăслă ача-2011» ята Энĕшпуçĕнчи «Радуга» ача садĕнчи Александр Тихонов тивĕçнĕ. Çавăн пекех участниксене тĕрлĕ номинацисенче палăртса хăварнă. Акă, «Чи пуçарулли» Вăрмарти «Березка» пĕрремĕш номерлĕ ача садĕнчи А.Мясников, «Нумай пĕлекен» Вăрмарти «Колосок» иккĕмĕш номерлĕ ача садĕнчи К.Семенов, «Чи талантли» Вăрмарти «Зоренька» виççĕмĕш номерлĕ ача садĕнчи К.Егорова, «Чи тавçăрулли» Вăрмарти «Ромашка» тăваттăмĕш номерлĕ ача садĕнчи Т.Риманова, «Чи ăнкарулли» Мăнçырмари вăтам шкул çумĕнчи шкул çулне çитмен ачасен ушкăнĕнчи М.Григорьев, «Чи тăнли» Энĕшпуçĕнчи «Радуга» ача садĕнчи А.Тихонов пулнă, «Вĕренме ăнтăлнăшăн» номинацие Кĕтеснерти «Солнышко» ача садĕнчи Г.Степанов тивĕçнĕ.