06 мая 2011 г.
К.Иванов ячĕллĕ Чăваш патшалăх драма театрĕнче ĕç династийĕсен 9 слечĕ иртнĕ. Пĕр предприятире, ял хуçалăх пĕрлешĕвĕнче вăй хуракансем е хăйсен профессирен ăруран ăрăва, ашшĕ-амăшĕнчен ачисене, мăнукĕсене паракансем чăваш хутлăхĕнче 1000 çемье ытла. Слета вара республикăри хуласемпе районсенчи чи маттур 34 ĕç династийĕ пуçтарăннă. Вĕсене ЧР Президенчĕ М.Игнатьев пархатарлă ĕçĕшĕн тав сăмахĕ каларĕ, чи лайăх çемьесене наградăларĕ, хаклă парнесемпе чысларĕ.
Вĕсен шутĕнче Кивĕ Вăрмар ялĕнчи Эверсковсен çемйи те. Династи стажĕ 1500 çултан та иртет. Унăн пуçлăхĕ Геннадий Эверсков ахаль кайăк-кĕшĕк пăхаканран «Урмарская» кайăк-кĕшĕк фабрикин директорĕ таранах çитнĕ. Халĕ те вĕсен династийĕнчен 57-шĕ ял хуçалăхне парăнса ĕçлеççĕ. Династие пуçарса яракансем Яков, Михаил, Филимон пĕр тăвансем пулнă. Хальхи династи пуçлăхĕн Геннадий Германовичăн, унпа пĕр тăвансен 10 ачи те çĕр çинче тăрăшаççĕ.
«Пирĕн йăхра 3 колхоз председателĕ пулнă. Эпир ял хуçалăх ĕçне пуçĕпех путнă темелле:мăшăр ялти кайăк-кĕшĕк фабрикинче 40 çул таранчченех ĕçленĕ, ывăл - тимĕрçĕ, кин выльăх апачĕн цехĕнче тăрăшать», - каласа парать Г.Эверсков. Энĕшпуçĕнчи пушарниксен династине пуçарса яракан Пĕрремĕш Тĕнче вăрçин участникĕн Константин Крдыковăн историйĕ те хăйне евĕр интереслĕ. Ялта, революцичченех, пушар хуралĕ йĕркелесен вĕсем пĕр тăванĕпе иккĕшĕ черетпе ял халăхне «хĕрлĕ автанран» сыхланă. Константинăн ывăлĕ Николай та вăрçăран таврăнсан колхозри пушар хуралĕнче ĕçлеме тытăнать. Çапла ку йăхри ывăлсем те пушарниксем пула-пула тăнă, каярахпа вара хĕрарăмĕсем те арçынсенчен кая мар пулнине çирĕплетсе çак профессипе çыхăнтарнă хăйсене. Чăвашра пушар ĕçĕнчи пĕрремĕш спорт мастерĕ, пĕрремĕш хут Паттăрлăхшăн орденне икĕ хутчен тивĕçнĕ В.Нягин полковник шăп та çак династи представителĕ. Крдыковсен династийĕнчи 72 офицерĕ çинче çĕршывĕпе 100-шер сÿнтернĕ пушар, 10-шар çăлса хăварнă пурнăç.