Публикации » Ĕмĕт уçлăха йыхăрать

26 апреля 2011 г.

Космонавтика çулне халалласа Аслă Чакри пĕтĕмĕшле пĕлÿ паракан тĕп шкулта «Тĕнче уçлăхĕ» ятпа конкурс иртрĕ. Чи малтанах ача садне çÿрекенсем «Самолет» юрă шăрантарчĕç. Кĕçĕн класра вĕренекенсем вара тĕнче уçлăхĕ çинчен хайланă сăвăсем илемлĕн вуларĕç. 5-9 классенче вĕренекенсем асăннă темăпа электронлă презентаци хатĕрленĕ. Пĕрремĕш космонавт Ю.Гагарин кун-çулĕпе 8-мĕш класра вĕренекен Лиана Григорьева паллаштарчĕ. Аэлита Андриянова хамăр ентеш-космонавт А.Николаев пирки тĕплĕн ăнлантарчĕ. Чи малтан тĕнче уçлăхне арçын космонавтсем, унтан пĕрремĕш хут хĕрарăм космонавтсем вĕçни пирки 5-мĕш класра вĕренекен А.Иванова каласа пани пурне те тыткăна илчĕ. Залра ларакан ачасем хушшинче интереслĕ викторина та иртрĕ. 7-мĕш класра вĕренекенсем К.Циолковский, С.Королев ученăйсене те асăнса хăварчĕç. Кун пек интереслĕ конкурссем ачасен тавра курăмне анлăлатаççĕ. Пĕр космонавтран: «Мĕнрен пуçланать-ха пысăк çул;», - тесе ыйтсан, вăл çапла хуравланă: «Ĕмĕтрен». Пирĕн ачасем те йывăрлăхсене парăнтарса хăйсен ĕмĕрĕнче пысăк çитĕнÿсем тăвасса шанас килет.