26 апреля 2011 г.
Иртнĕ кунсенче пирĕн районта республикăра тухса тăракан «Чăваш хĕрарăмĕ» хаçат кунĕ районти культура çуртĕнче иртрĕ. Ăна хĕрарăмсен районти канашĕн председателĕ Г.Петрова уçрĕ. Вăл чи малтанах хĕрарăмсен районти канашĕн ĕçĕ-хĕлĕпе паллаштарчĕ. Районти хĕрарăмсен канашĕ кăçал республикăра малти вырăна тухни çинчен пĕлтерчĕ. Залра ларакансем çавăн пекех электронлă презентаципе паллашрĕç. Галина Леонидовна «Чăваш хĕрарăмĕ» хаçат çинчен те чылай ырă сăмахсем каларĕ. «Кунта чăваш хĕрарăмĕн кун-çулĕ, вĕрентÿпе воспитани ĕçĕ-хĕлĕ, йăла ыйтăвĕсем, культура аталанăвĕ тата ытти те анлăн сăнарланать. Хаçат вăл - пурнăç тыткăчи, çемье çирĕплĕхĕ. Тĕрлĕ информаципе пуян хаçата вулас килет. Шăпах «Чăваш хĕрарăмĕ» çавăн пек хаçатсенчен пĕри», - терĕ вăл. Уява хутшăннă райадминистрацин организаципе контроль ĕçĕсен пайĕн начальникĕ Н.Павлов, почта çыхăнăвĕн районти уйрăмĕн начальникĕ С.Риманов «Чăваш хĕрарăмĕ» хаçат пирки чылай ăшă сăмахсем каларĕç, малашне те халăха кирлĕ материалсемпе тивĕçтерсе тăрасса шаннине пĕлтерчĕç.
Асăннă хаçатăн тĕп редакторĕ М.Ильина хаçат кун-çулĕпе тата хăйсен ĕçĕ-хĕлĕпе тĕплĕн паллаштарчĕ. «Чăваш хĕрарăмĕ» те хăйĕн тусĕсене хавхалантармасăр, савăнтармасăр хăвармарĕ. Чăваш эстрада юрăçисем И.Шинжаев, П.Борисова уява пухăннисен кăмăлне çĕклерĕç. Хаçатăн тĕп редакторĕ М.Ильина пултаруллă çыравçă пулнипе пĕрлех ăста юрăç та. Вăл хăйĕн çепĕç сассипе тăван ене халалланă юрăсем шăрантарчĕ. А.Юрату сăвăç хăйĕн чуна пырса тивмелле сăввисемпе куракансен кăмăлне çĕклерĕ. Хаçатăн чи çывăх тусĕсем валли ятарласа лотерея вылявĕ иртрĕ. Асăннă хаçата çырăннисенчен чылайăшĕ парнеллĕ пулчĕç.