26 апреля 2011 г.
Пирĕн республикăра чăх, хур, кăркка чĕппи кăларас енĕпе ĕçлекен хуçалăхсенчен пĕри - «Урмарская» ăратлă кайăк-кĕшĕк фабрики» АУО. Çуркунне енне кайсан кунтан халăх татăлма та пĕлмест. Хуçалăхăн кантурĕ умĕнче кашни ирех тĕрлĕ регионсенчен килекен машинăсене курма пулать. Суйламалли пур - пĕрисем ăратлă çăмарта, теприсем чĕпписене илме килеççĕ. Çынсем кунта туртăнни хуçалăхра экологи тĕлĕшĕнчен пур енĕпе паянхи кун ыйтăвне тивĕçтерекен продукци туса кăларнипе çыхăннă. Хакĕсем те çыртмаççĕ. Калăпăр, майăн 4,16-мĕш числисенче тухакан кăркка чĕпписем 160 тенкĕ тăрĕç. Апрелĕн 26-мĕшĕнче тухакан хур чĕпписене 130, майăн 2, 9, 19-мĕшĕсенче тухаканнисене 150 тенкĕпе илме пулĕ. Талăкри бройлер чĕпписене - вĕсене апрелĕн 29-мĕшĕнче, май уйăхĕн 6, 13, 20, 27-мĕшĕсенче, çавăн пекех июнĕн 6, 10-мĕшĕсенче кăлараççĕ - 22 тенкĕпе сутаççĕ. «Кÿршĕри чăх кăркка пек», - тенĕ ĕлĕк ватăсем. «Урмарская» кайăк-кĕшĕк фабрикинче чăххи те, хурĕ те, кăркки те кирлĕ шайра. Сăлтавне те уçса пама пулать: ăмсанмаççĕ вĕсем ытти хуçалăх ĕçченĕсене, технологие тытса пырса кирлĕ пек ĕçлеççĕ.