26 апреля 2011 г.
Ял хуçалăх ĕçченĕсемшĕн кĕçех хĕрÿ ĕççи пуçланать. Вĕсен çур акине кĕске вăхăтра тата пахалăхлă ирттерсе ямалла. Çак тĕллеве тĕпе хурса ĕçлеççĕ те ĕнтĕ Мăнçырмари «Павлов В.Ф.» хресчен (фермер) хуçалăхĕн ĕçченĕсем.
Унăн пуçлăхĕ Вячеслав Федорович Павлов палăртнă тăрăх, кăçалхи çур акине тухма вĕсем тĕплĕн хатĕрленнĕ. Çунтармалли-сĕрмелли материалсем 10 тонна кÿрсе килнĕ, техникăна тĕрĕслев витĕр кăларнă. Çитес вăхăтра уя пурĕ 9 единица техника тухмалла. Сÿресене пурне те юсаса çитернĕ. Машинăпа трактор паркĕнче çĕнĕ йышши техника хушăнса пыни хуçалăх тĕреклĕхне çирĕплетет. Кунта çĕнĕ МТЗ-82 маркăллă тракторсем - 2, «ACROS-530», «Дон-1500» маркăллă комбайнсем ĕç тухăçлăхне ÿстерме пулăшаççĕ. С.Егоров, Р.Гурьев трактористсем, Н.Родионов, Ю.Лукин водительсем, Ю.Казаков, Ю.Ильин, В.Иванов, С.Матвеев сеяльщиксем хăйсене шанса панă техникăна тирпейлĕ тытса пыраççĕ.
Паха вăрлăх - тухăç никĕсĕ. Çавна май кăçал Чулхула облаçĕнчи Аслă Болдино районĕнчен «Экада - 70» паха вăрлăх 100 тонна илсе килнĕ. Асăннă хуçалăхăн пĕтĕмĕшле çĕр лаптăкĕ 1500 гектар шутланать. Кăçал планпа палăртнă тăрăх, урпа - 100, сĕлĕ - 50, çурхи тулă 400 гектар акмалла. Е.Демидова склад заведующийĕ пĕтĕм вăрлăх кондициллĕ тесе пĕлтерчĕ. Çур акине 10-12 кунта ăнăçлă ирттерме палăртаççĕ. Ĕççи вăхăтĕнче Т.Гурьева повар кашнинчех техĕмлĕ апатпа сăйлама тăрăшать.
Усă курман çĕрсене пусă çаврăнăшне кĕртессипе чылай ĕçсем туса ирттернĕ «Павлов В.Ф» хресчен (фермер) хуçалăхĕнче. Пĕтĕмĕшле каласан, кунти ĕçченсем çур акине хатĕр.