22 апреля 2011 г.
Халăха шывпа тивĕçтерес ĕçри йывăрлăхсемпе уйрăмах çуллахи вăхăтра эпир час-часах тĕл пулатпăр. Çакна пирĕн поселокри çуртсен 3-мĕш хутĕнче пурăнакансем уйрăмах çивĕч туяççĕ. Кăçал район прокуратури шыв ыйтăвне тĕрĕслесе тăрассине хăй çине илет. Район халăхне шывпа тивĕçтерессипе «Водоканал» тулли мар яваплă общество ĕçлет.
Вăрмар поселокĕнче пурăнакансене чĕнсе каласшăн - енчен те сирĕн хваттерсене, çуртсене шыв пама пăрахрĕç пулсан прокуратурăна çак номерлĕ телефонсемпе шăнкăравласа пĕлтерĕр: 2-17-55, 2-12-68.
Енчен те прокуратура çакăн сăлтавĕ «Водоканал» тулли мар яваплă общество ĕçĕ-хĕлĕпе çыхăннине тупса палăртрĕ пулсан, айăплă çын РФ административлă йĕркене пăсни çинчен калакан Кодексăн 7.23 статйипе килĕшÿллĕн административлă явап тытĕ. Халăха нормăпа пăхнă коммуналлă пулăшу парассине пăснăшăн должноçри çынна 500 тенкĕрен пуçласа 1000 тенкĕ таран, юридици сăпатĕнчине 5-10 пин тенкĕ таран штрафлама май парать.