22 апреля 2011 г.
Мăнкун - Христос тĕнĕн чи Аслă уявĕ. Вăл Иисус Христос ячĕпе çыхăннă. Икĕ пин çул каярах Вифлеем хулинче çуралнă Иисус çĕр çинче 33 çул кăна пурăннă. Евангели вĕрентĕвĕ тăрăх вăл халăх ырлăхĕшĕн асапланса вилнĕ, ăна çĕр çинчи çынсен çылăхĕсемшĕн хĕрес çумне пăталанă.
Иисус ÿтне хĕрес çинчен антарнă хыççăн касса кĕрсе тунă шăтăка пытарнă, шăтăк çăварне пысăк чулпа хупласа хунă. Тата çакăнта хурал тăратнă, мĕншĕн тесен священникпе фарисейсем* Иисус ÿтне Унăн вĕренекенĕсем вăрласа каясран хăранă.
Виççĕмĕш кунне хĕрарăмсем Иисуса пытарнă шăтăк патне кайнă. Унта çитсен шалтах аптăранă: шăтăк çăварне хупланă чула такам айккине илсе хунă, хуралçăсем тăнсăр выртнă, тупăкра Иисус ÿчĕ çук! Хĕрарăмсем хăраса-пăшăрханса ÿкнĕ. Акă сасартăк çиçсе тăракан тумтир тăхăннă Ангел курăннă, вăл çапла каланă:
«Иисуса виле шăтăкĕнче ан шырăр: Вăл кунта çук! Вăл - чĕрĕ, хăй каланă пек, Вăл вилĕмĕнчен чĕрĕлсе тăчĕ! Кайăр та çакăн çинчен Унăн вĕренекенĕсене каласа кăтартăр!» Вĕсем Христос чĕрĕлсе тăни çинчен Унăн вĕренекенĕсене каласа кăтартнă. Иисус Христос тата Петр Апостола, Еммауса каякан икĕ вĕренекенне, Лукапа Клеопăна, унтан пур Апостола та курăннă.
Христос чĕрĕлсе тăнă кун Христоса ĕненекенсемшĕн чи аслă праçник, вăл куна Мăнкун теççĕ. Çак кун чиркÿре ытти кунсенчи кĕлĕсенчен урăхла кĕлĕ, чаплă кĕлĕ, пулать. Ун чух ирхи кĕлĕ шăп çур çĕрте пуçланать. Ирхи кĕлĕ умĕн священниксем çап-çутă тумтирсем тăхăнаççĕ те, çутнă çуртасем тытса, хĕрес илсе, турăшсем йăтса, чан çапса ĕненекенсемпе пĕрле чиркÿ тавра çаврăнаççĕ. Çапла çаврăнни мирă çăвĕ илсе пынă хĕрарăмсем Христос ÿтне шыранине пĕлтерет. Ирхи кĕлле чиркÿ алăкĕ умĕнче пуçлаççĕ, алăкĕ ун чухне хупăнса тăрать. Унта Мăнкун юррине: «Христос вилĕмĕнчен чĕрĕлнĕ»... тесе темиçе хутчен юрлаççĕ, çав юрра юрласах чиркĕве кĕрсе каяççĕ. Мăнкун эрнинче кĕлĕ тунă чух алтарь алăкĕ эрнипех уçă тăрать. Вăл праçникре эпир пĕр-пĕрне чуп туса хĕрлĕ çăмарта паратпăр.
* Фарисейсем – авалхи Иудейăри тĕнпе политика партийĕ. Пуян хула çыннисен интересĕсене хÿтĕленĕ, хăйсене сăваплă çынсем пек тытнă, çав вăхăтрах «икĕ питлĕ» пулнипе уйрăлса тăнă.
(Ют сăмахсен словарĕнчен).