22 апреля 2011 г.
«Спортпа туслă пулакан - сывлăхне упракан», - теççĕ. Чăн та, ырă-сывă пурнăç йĕркине кунран-кун тытса пырсан пирĕн кĕлетке, ÿт-пÿ те сывă пулĕ, кăмăл-сипет енчен те хавшамĕ.
Сывлăха çирĕплетмешкĕн нумайăшĕ паян «Илем» физкультурăпа спорт комплексне çÿрет. Ячĕ те мĕне тăрать! «Илем» ячĕпе кăна мар, хăйĕн пĕлтерĕшĕпе те çынна илĕртет. Кунта, чăнах та, тĕрлĕ ăрури çынсем сывлăхĕпе пĕрлех кăмăл-сипет тĕлĕшĕнчен те сипленеççĕ. Пĕр тăван Алексейпе Артем Силеровсем вара шывра ишме вĕренме кăмăлланă. Эрнере 3 хутчен уроксем хыççăн хăйсен кăмăл-туйăм туртнипе занятире пулаççĕ. Малтанласа Светлана Николаевна тренер шывра пĕрремĕш хусканусем тутарать, тавлашмалла иштерет. Каярахпа вара Игорь Владимирович тренер вĕсемпе активлăрах ĕçлеме пуçлать. Тĕрлĕ меслетпе - крольпе, браспа, çурăм çинче ишессине хăнăхтарать. Пĕр занятире Артем (2000 çулхи), 3 км, Алексей (2002 çулхи) 2 км дистанцие парăнтараççĕ.
Пĕрремĕш утăмсем, пĕрремĕш кăтартăвĕсем... Кĕске вăхăт хушшинчех Артем Вăрмарта крольпе ишессипе 10 çамрăк хушшинче 2-мĕш разряд нормативĕсене пурнăçласа 2-мĕш вырăна тухнă. Унсăр пуçне Куславкка хулинче районсем хушшинче иртекен ăмăртура ăнăçлăн тупăшнă. Шăллĕ те унран юласшăн мар, çитĕнÿсем тумашкăн тĕллев лартнă вăл. Паллах, ку вăл пĕр тĕслĕх кăна. Акă ăста тренер, вăлах директорăн заместителĕнче вăй хуракан И.Алешин каланă тăрăх, кĕске тапхăр хушшинчех 45 çын - 18 çултан пуçласа 60 çулхи арçынсемпе хĕрарăмсем шăпах пĕрремĕш хут ишме бассейнра вĕренчĕç. Шывра ишни пирĕн сывлăхшăн, шалти сывлав органĕсемшĕн, чĕрешĕн, тĕрлĕ мышцăсемшĕн калама çук усăллă. Авалхи грексем: «Вăл вулама та, ишме те пĕлмест», - тенĕ. Ăслă каларăш. Апла, ишме пĕлни интеллект палли те пулнă.
Эпир паян кирек хăш вăхăтра та тăрă та ăшă шывра ишсе киленме пултаратпăр. Пĕлместĕн пулсан - хăй ĕçĕнчи чăн ăста специалистсем сана ишме вĕренмешкĕн пулăшĕç. Хакĕ те «çыртмасть». Акă, Игорь Владимировичăн вĕренекенĕсем ун пиркиех: «Çав тери ăнланма пĕлекен, вĕсемпе яланах ырă пулнине, кирек хăçан та пулăшма ăнтăлнине, çирĕп дисциплинăна палăртаççĕ. Пĕрмаях çĕннине шырать вăл».
Пурлăхпа техника базине çирĕплетессипе вара унăн директорĕ О.Иванов пысăк тăрăшулăх кăтартать. Тренерсене спорт инвентарĕсемпе тивĕçтерет, физкультурăпа спорт комплексне хăтлăх кĕртессипе тăрăшать.
«Пĕрлĕхре кăна вăй», теççĕ. Çавăнпа «Илемĕн» ĕçĕ курăмлă, кăтартăвĕ пысăк.