19 апреля 2011 г.
Космонавтика кунĕнче Урнар шкулĕнче Ю.Гагарин тĕнче уçлăхне вĕçнĕренпе 50 çул çитнине чысласа савăнăçлă пуху иртрĕ.
Ăна библиотека заведующийĕ А.Алексеева уçрĕ, космонавтсем çинчен, ытларах пирĕн чăваш паттăрĕ А.Николаев çинчен каласа кăтартрĕ, ун çинчен çырнă «Притяжение земли» ятлă кĕнекепе паллаштарчĕ. Унтан Ю.Гагарин космонавт космоса вĕçсе кайни, пирĕн çĕршыв пуринчен те малтан çÿлти çутăсем çÿрекен орбитăна çынна вĕçтерсе яма пултарни тата хальхи вăхăтра космонавтика мĕнле аталанса пыни çинчен Н.Никифоров пенсионер доклад туса пачĕ, çакă историри паллă ĕçе ПНОн (ООН) Генеральнăй Ассамблейи хисеплесе çак куна Пĕтĕм тĕнче шайĕнчи уяв ятне пани çинчен пĕлтерчĕ, çак праçникĕн юбилейĕ çитнĕ ятпа пухăннисене саламларĕ. Çавăнпа пĕрлех 1961-1963-мĕш çулсенче Байконур космодромĕнче çар службинче пулнă Урнар ял çынни Владислав Платонович Платонова «50 лет - космонавтике» асăнмалăх медаль парса наградăларĕ. Кун хыççăн «Сарнар» фольклор ансамблĕ чаплă концерт лартса пачĕ, клуба пухăннă Урнарпа Саруй ял халăхне савăнтарчĕ. Концертра космонавтика темипе çырнă юрăсем янăрарĕç. Уйрăмах «Я-земля» юрă чуна тивĕртмелле шăранчĕ, А.Николаевăн юратнă «Вĕç-вĕç куккук» юрра юрланă чух хăш-пĕр ватă çынсен куçĕсем шывланчĕç. Юрăсем хушшинче урăхла номерсем те пулчĕç. В.Иванова анекдотсем каласа халăха култарчĕ, клуб заведующийĕ Л.Иванова пĕрремĕш хĕрарăм-космонавт В.Терешкован биографине аса илтерчĕ, унăн пурнăçĕпе, ĕçĕ-хĕлĕпе паллаштарчĕ. Çапла вара икĕ сехете яхăн пынă концерт пĕр сисĕнмесĕр иртсе кайрĕ. Халăх питĕ савăнса тăвăллăн алă çупса саламларĕ. Хăйсене килĕшнĕ юрăсене юрласа пама, малалла та çакăн пек концертсем лартса пама ыйтрĕç. Концерта курса-итлесе ларнă май кăкăр тулли мăнаçлăх туйăмĕпе хăпартлантăм.