08 апреля 2011 г.
Колхозсемпе совхозсем шавласа, кĕрлесе тăнă чух ял хуçалăхĕнче вăй хуракансен йышĕ нумайччĕ. Вĕсен хушшинче районта, республикăра палăрнă дояркăсемпе механизаторсем те сахал мар пулнă. Çав тапхăртан пуçласа паянхи кунччен те ял хуçалăх отраслĕнче ĕçлекенсенчен пĕринпе - Николай Васильевич Петровпа - паллаштарасшăн вулакансене.
Вăл 1956 çулта Кивĕ Вăрмар ялĕнче çуралнă. Ялти шкула вĕренсе пĕтерсен «Урмарский» совхозра ĕçлеме тытăнать. Мĕн ачаран ял хуçалăх техникине кăмăлланăскер, механизатор пулса тăрăшать. Çар ретне те хăй ĕçленĕ вырăнĕнченех кайнă вăл. Чăваш каччи çĕршыв умĕнчи çар хĕсметĕн тивĕçне чыслăн пурнăçлать. Салтакран килсен Н.Петров тÿррех тăван хуçалăхра ĕçлеме тытăнать. 1973 çултан пуçласа паянхи кунччен те механизатор пулса ĕçлет. Т-150 маркăллă тракторпа кашни çулах ака-суха ĕçĕсем пурнăçлать. Акă иртнĕ çул пултаруллă Н.Петров механизатор 483 гектар çинче кĕрхи çĕртме, БДТ–7 агрегатпа 597 гектар хура пусă тунă. Кĕрхи культурăсем акма 447 гектар çĕр сухаласа хăварнă. Иртнĕ çул пĕтĕмĕшле 1928 гектар çĕр сухаланă. Ака-суха вăхăтĕнче канăçа пĕлмест ял ĕçченĕ. Механизаторсен ĕçĕ вара тата та йывăртарах тесе калас килет. Ирхи шурăмпуçпа уя тухса каяççĕ те сĕм çĕрлеччен çанă тавăрса ĕçлеççĕ. «Хĕрÿ ĕççи вăхăтĕнче трактор кабининчех çĕр каçнисем те чылай пулнă. Кашни ĕçĕн хăйĕн вăхăчĕ. Пурне те вăхăтра ĕлкĕрмелле», - тет Николай Васильевич çурхи хĕвел еннелле ăшшăн пăхса. Çурхи ĕçсем кунран-кун çывхарса пырасса чунĕпе туять вăл.
Пăхатăп та ун çине, ман умра чăн-чăн çĕр ĕçченĕ тăрать. Хăйĕн Т–150 маркăллă тимĕр «урхамахне» вăл чылайранпа алран ямасть. Шанса панă техникăна таса та типтерлĕ тытать. Çирĕм çул ытла ĕçлет вăл çак тракторпа.
«Николай Васильевич чăннипех те пултаруллă механизатор. Хуçалăх ĕçĕнче вăл курăмлă ÿсĕмсем тăвать. Çамрăк ăрушăн чăннипех те ырă тĕслĕх», - тет обществăн пуçлăхĕ Николай Петрович Петров.
Ĕçне кура - хисепĕ. Ял хуçалăх отраслĕнче пысăк ÿсĕмсем тунăшăн Николай Васильевич иртнĕ çул «Чăваш Республикин тава тивĕçлĕ механизаторĕ» ята тивĕçнĕ. Пархатарлă ĕçшĕн район администрацийĕ тата ытти ведомствăсем панă Хисеп грамотисемпе Тав çырăвĕсем те чылай унăн.
Мăшăрĕпе, Людмили Ильинична Петровапа, икĕ ача çитĕнтерсе пурнăçăн анлă çулĕ çине кăларнă. Хĕрĕ, Надежда, экономист специальноçне алла илнĕ. Ывăлĕ, Сергей, Шупашкарти ял хуçалăх академийĕн механизаци факультетĕнче ăс пухать. Эппин ял хуçалăх ĕçченĕсен династийĕ малалла тăсăласса шанас килет.