05 апреля 2011 г.
Ачаран сывă та тĕреклĕ ÿсесси кашни çыннах питĕ кирлĕ. Мĕн пĕчĕкрен сывă пурнăç йĕркине тытса пыракансем тĕрлĕ чир-чĕр мĕнне те пĕлмеççĕ, мĕн ватăличченех çирĕп сывлăхлă пурăнаççĕ.
Сывă та тĕреклĕ пулма физкультурăпа туслă пулни те пысăк пĕлтерĕшлĕ. Çавна шута илсе Кивĕ Вăрмарти вăтам шкулта кашни эрнере пĕр хутчен сывлăх кунне ирттереççĕ. Тĕрлĕ мероприятисем йĕркелесе ирттерессипе физкультура учителĕ А.Никифоров чылай тăрăшать. Акă нумаях пулмасть волейбол турнирĕ иртрĕ. Кунта 5 ушкăн вылярĕç. Вăйăра учительсен ушкăнĕ, 11 класра вĕренекен арçын ачасен, 9-11 класра вĕренекен арçын ачасен тата 9-11 классенче хĕр ачасен ушкăнĕсем пĕр-пĕрин хушшинче тупăшса вылярĕç. Çивĕч пулчĕ кĕрешÿ. 11-мĕш класра вĕренекен арçын ачасем чи пултаруллисем пулса 1-мĕш вырăна тивĕçрĕç. 2-мĕш вырăнта - учительсем, 3-мĕшне 10-мĕш класс арçын ачисен ушкăнĕ тивĕçрĕ. 5-8-мĕш классенче вĕренекенсем мини-футбол вăййинче вăй виçрĕç. Ку вăйăра чи пултаруллисем вара 7-мĕш класра вĕренекенсем пулчĕç. Сывлăх кунĕнче кĕçĕн классенче вĕренекен ачасем те айккине юлмарĕç. 1-4 классенче вĕренекенсем эстафета йĕркипе тĕрлĕ ăмăртусенче тупăшрĕç. Çуран чупассипе те, мечĕксемпе тĕрлĕ вăйăсемпе выляса та, скакалкăпа сиксе, çаврашкасем витĕр тĕрлĕ хусканусем туса та ăмăртмалла пулчĕ вĕсен. Эстафетăра 4-мĕш классем чи маттуррисем пулчĕç.
Çакăн пек сывлăх кунĕсене ирттерни ачасене килĕшет. Кашни кĕçнерни куна вĕсем чăтăмсăррăн кĕтеççĕ.