05 апреля 2011 г.
Çĕршывра çурхи призыв пуçланчĕ. Çара кама хăçан тата мĕн вăхăта илессине «Çар тивĕçĕ тата çар служби» федераци саккунĕнче палăртнă. 2006 çулхи июлĕн 6-мĕшĕнче унта улшăнусем кĕртнĕ, вĕсем 2008 çулхи январĕн 1-мĕшĕнче вăя кĕнĕ. Тĕп улшăнусем хĕсмет вăхăтне 1 çулталăка хăварнипе, çурхи кампание тăснипе, отсрочкăсене сахаллатнипе тата улăштарнипе çыхăннă.
Призыв çулталăкне икĕ хут (апрелĕн 1-мĕшĕнчен июлĕн 15-мĕшĕччен тата октябрĕн 1-мĕшĕнчен декабрĕн 31-мĕшĕччен), анчах РФ Президенчĕ Указ кăларнă хыççăн çеç иртет, çĕршыв ертÿçин призыв тапхăрне кĕскетме ирĕк пур, вăрăмлатма - çук.
Призыв тапхăрĕсем: медицина тĕрĕслевĕ витĕр тухни, призыв комиссийĕн ларăвне килни. Çар комиссариатне, хĕсмет вырăнне кайма çитни, салтака кайиччен çар комиссариатĕнче пулнă тапхăр.
Çакă йăлтах призыв тапхăрĕнче çеç иртме пултарать, эппин, çамрăка медтĕрĕслеве, калăпăр, март уйăхĕнче чĕнсе илме юрамасть. Анчах «Çар тивĕçĕ тата çар служби» федераци саккунĕн 25 статйипе килĕшÿллĕн вĕрентÿ учрежденийĕнче педагогра ĕçлекенсемшĕн призыв тапхăрне майăн 1-мĕшĕнчен июлĕн 15-мĕшĕччен, ялта пурăнакан, ака-вырма ĕçĕнче тăрăшакан çамрăксемшĕн октябрĕн 15-мĕшĕнчен декабрĕн 31-мĕшĕччен уйăрнă.
Медицина тĕрĕслевĕ вăхăтĕнче каччă çара кайма юрăхлипе юрăхлă маррине палăртаççĕ. Çакăн хыççăн призыв комиссийĕ йышăну тăвать (призывран хăтарать, вăхăтлăх отсрочка парать, çар тивĕçне альтернативлă майпа тухма ирĕк парать, запаса ярать). Раççей субъекчĕн çар комиссариатĕнчен хĕсмет вырăнне кайнă кун призывникран салтак пулса тăрать, унăн хĕсмет тапхăрĕ пуçланать. Медицина тĕрĕслевĕпе е призыв комиссийĕн пĕтĕмлетĕвĕпе килĕшмесен çакна судра татса пама май пур.
Призыв кама пырса тивет?
РФ гражданинне, çар учетĕнче тăракан е тăма тивĕç 18-27 çулсенчи арçынсене. Эппин, çар тивĕçĕнчен хăтарнă (кама тата мĕншĕн хăтарнине саккунра палăртман), çар тивĕçне пурнăçлакан е альтернативлă граждан службинче тăракан, пĕрмай чикĕ леш енче пурăнакан (çĕршывран 6 уйăхран нумайлăха тухса каякансен çар учетĕнчен тухмалла), РФ хăрушсăрлăх тата тулаш разведкин службисен запасри офицерĕсемсĕр пуçне çÿлерех асăннă ÿсĕмри кашни каччăнах пырса тивет. Вăл запасра тăмасть пулсан. Запаса çар тивĕçне пурнăçламан, аслă шкулта çар кафедрине ăнăçлă вĕçленĕ офицерсене тата призывран хăтарнисене кĕртеççĕ.
Призывран кама хăтараççĕ?
Сывлăха пула çар тивĕçне пурнăçлама юрăхсăррисене тата çителĕксĕр юрăхлисене («Д» тата «Б» категори). Çарта пулнисене тата çар тивĕçне пурнăçлакансене. Урăх çĕршывра çар тивĕçне пурнăçланисене. Патшалăх тытăмĕн аттестацийĕпе ăсчах степеньне илнисене. Призывпа хĕсметре е çар сборĕнче пулнă тапхăрта çар тивĕçне пурнăçланă чухне вилнисен ывăлĕсене е пĕр тăванĕсене. Юлашки виçĕ пунктра асăннисен призывран юлма ирĕк пур. Çапах та, вĕсем хăйсен кăмăлĕ пулсан çара кайма пултараççĕ.
Саккунра çара юрăхсăррисен йышне палăртнă: ирĕклĕх прависĕр хăварнисем, арестленисем, ĕçлесе юсанакансем, судпа айăпланнисем, çара кайма вăхăт çитнĕ каччă тĕлĕшпе дознани, следстви пырать е уголовнăй ĕç пуçарнă пулсан.