05 апреля 2011 г.
Районти Культура çуртĕнче иртнĕ «Çулталăк вĕрентекенĕ-2011» конкурса район администрацийĕн пуçлăхĕ К.Никитин уçрĕ. «Вĕрентекен профессине тĕнчере урăх нимĕнле профессипе те танлаштарма çук. Çак ĕçре пахалăхлă пĕлÿ панипе пĕрлех ăс-хакăл, чунлăх туйăмĕ те кирлĕ. Вĕрентекенĕн тĕп тĕллевĕ - ачасене, ĕçе чунтан юратни. Эпир хамăрăн вĕрентекенсемпе мухтанатпăр. Сире пархатарлă ĕçшĕн тав тăватпăр, пурне те çирĕп сывлăх, ĕçре ÿсĕмсем, тăнăçлăх сунатăп», - терĕ Константин Владимирович вĕрентекенсене саламласа.
Конкурса 15 вĕрентекен хутшăнчĕ. Вĕсем пурте пысăк ăсталăхпа палăрнă. Асăннă конкурс икĕ тапхăрпа иртнĕ. Пĕрремĕшĕ - «Методика семинарĕ», «Вĕрентÿ ĕçĕ», иккĕмĕш тапхăр - «Педагогика канашĕ». Пĕрремĕш тапхăрта пур конкурсантсем те хутшăннă. Вĕсем хăйсен профессиллĕ опычĕпе паллаштарнă, уçă уроксем панă, вĕсем вара çÿллĕ шайра иртнĕ. Кашни урокĕ ачасемшĕн чăн-чăн çĕнĕлĕх пулнă, вĕсем вĕрентекенсем пулăшнипе вĕренÿре пахалăхлă пĕлÿ илме пултарнă. Вĕрентекенсем уроксенче çĕнĕ технологисемпе усă курни те пысăк пĕлтерĕшлĕ пулнă. «Çулталăк вĕрентекенĕ-2011 конкурсра районти шкулсенчен финала тухнă çичĕ педагогăн ĕçĕ-хĕлне пĕтĕмлетрĕç, тĕрлĕ номинацире çĕнтерÿçĕсем те палăртрĕç. Акă вĕсем: Мăнçырмари пĕтĕмĕшле пĕлÿ паракан вăтам шкулта чăваш чĕлхипе литературине вĕрентекен Т.Цыркунова «Профессиллĕ тавра курăм» номинацире, Аслă Чакри пĕтĕмĕшле пĕлÿ паракан тĕп шкулта тăван ен культурине вĕрентекен И.Яковлева - «Творчествăлла аталану тата педагогика ĕçĕнчи шырав», Кĕлкешри пĕтĕмĕшле пĕлÿ паракан тĕп шкулта пуçламăш классене вĕрентекен М.Данилова «Хăй ĕçĕнче чăн ăста», Вăрмарти Г.Е.Егоров ячĕллĕ пĕрремĕш номерлĕ вăтам шкулти вырăс чĕлхипе литературине вĕрентекен Е.Ларионова - «Темăна анлăн уçса пама пултаракан», Шăхальти пĕтĕмĕшле пĕлÿ паракан тĕп шкулти технологи предметне вĕрентекен А.Горбунов «Класпа пĕрле пысăк пахалăхпа ĕçлени», Пинерти пĕтĕмĕшле пĕлÿ паракан тĕп шкулти биологи предметне вĕрентекен Л.Сапаркина «Чи лайăх уçă урок», Пысăк Енккассинчи пĕтĕмĕшле пĕлÿ паракан вăтам шкулта информатика предметне вĕрентекен А.Григорьева «Вĕренÿри çĕнĕлĕхсем» номинацисенче çĕнтерÿçĕсем пулнă.
Жюри членĕсем чи лайăххине суйласа илчĕç. «Çулталăк вĕрентекенĕ - 2011» ята Пинерти пĕтĕмĕшле пĕлÿ паракан тĕп шкулта биологи предметне вĕрентекен Лидия Николаевна Сапаркина тивĕçрĕ. Вăл çитес вăхăтра республикăри конкурсра пирĕн района хÿтĕлĕ. Уява хăйĕн илĕртÿллĕ ташшисемпе шкул ачисем (ертсе пыраканĕ О.Бережецкая), ачасемпе çамрăксен Вăрмарти ÿнер шкулĕн вĕрентекенĕсем çепĕç сассисемпе илем кÿчĕç.