05 апреля 2011 г.
Пĕтĕм тĕнчери ĕç сыхлавĕн кунне халалласа апрелĕн 1-мĕшĕнчен пуçласа 30-мĕшĕччен пирĕн районта ĕç сыхлавĕн уйăхлăхĕ иртет. Унăн тĕп тĕллевĕ – организацисен руководителĕсене, ĕç паракансене ĕçлекенсен ĕç условийĕсем çине ытларах тимлĕх уйăрттарасси, производствăра суранланассине тата чирлессине чакарасси, организацисенче ĕç условийĕсене лайăхлатассине пропагандăласси.
Çакăнпа килĕшÿллĕн район администрацийĕн пуçлăхĕ К.Никитин 2011 çулхи мартăн 30-мĕшĕнче 135 номерлĕ Йышăну тунă ĕç сыхлавĕн уйăхлăхĕнче районта тĕрлĕ йышши мероприятисем ирттерме планланă. Организацире уйăхлăх ирттерессине хăй çине руководитель тата профсоюз комитечĕ илет, районта вара - Вăрмар район администрацийĕн ĕç условийĕсен тата сыхлавĕн Координаци канашĕ. Унăн секретарĕ - В.Иванов.
Чи малтанах апрелĕн 4-8-мĕшĕсенче райадминистрацин ларусен залĕнче Ĕç сыхлавĕн республикăри центрĕн специалисчĕсем районти бюджет организацийĕсен руководителĕсемпе тата хула ял тăрăхĕсен пуçлăхĕсемпе ĕç сыхлавĕ енĕпе вĕрентÿ ирттереççĕ. Çавăн пекех кунта çак енĕпе кăларнă нормативлă литературăн тата ятарлă ĕç тумĕн суту-илÿ куравĕсене йĕркелеме палăртнă.
«Урмарская» ăратлă кайăк-кĕшĕк фабрикинче ĕç сыхлавĕн Координаци канашĕн анлă ларăвĕ иртмелле. Гостехнадзор инспекцийĕпе пĕрле уйăхлăх вăхăтĕнче ял хуçалăх техникине тĕрĕслев витĕр кăлармалла, «ЧР Вăрмар районĕнчи ĕç сыхлавĕн чи лайăх специалисчĕ – 2011» конкурса пĕтĕмлетме планланă.
Унсăр пуçне рабочисене çак уйăхлăх вăхăтĕнче ĕç нормативĕсен акчĕсемпе, Конституцире калакан ĕç сыхлавĕн прависемпе тĕплĕнрех паллаштарма палăртнă.